លោកសមរង្ស៊ីធ្វើដំណើរ ដល់ម៉ាឡេស៊ីខណៈការចូលកម្ពុជារបស់គាត់កាន់តែខិតជិតមកដល់
ក្រុងភ្នំពេញ៖ បណ្ដាញផ្សាយព័ត៌មានលើបណ្ដាញសង្គម Facebook បានចុះផ្សាយព្រោងព្រាត អំពីការមកដល់របស់ប្រធានស្ដីទីនៃគណបក្សសង្រ្គោះជាតិគឺលោកសមរង្ស៊ី នៅប្រទេសម៉ាឡេស៊ី ស្ថិតតំបន់នៃអាស៊ីអាគ្នេយ៌។ លោកសមរង្ស៊ីត្រូវបានផ្តន្ទាទោស ជាច្រើនករណី ដែលនាំអោយ អ្នកនយោបាយរូបនេះលំបាក វិលចូលកម្ពុជាវិញ។ ដោយហេតុនេះ អគ្គស្នងការនគរបាលជាតិ បានស្នើសុំសហគមន៍អន្តរជាតិជួយឃាឃាំងឬឃាត់ខ្លួនលោកសមរង្ស៊ី។ យ៉ាងណា អ្នកនាំពាក្យក្រសួងមហាផ្ទៃ មានប្រសាសន៍ថាពិតជាការលំបាកក្នុងនាំខ្លួនលោកសមរង្ស៊ីព្រោះអ្នកនយោបាយនេះ មានលិខិតឆ្លងដែនបរទេស។
នៅក្នុងចំណោមហ្វេសបុកទាំងនោះ គឺមានទាំងផេកផ្ទាល់ខ្លួនរបស់លោក សមរង្ស៊ី ផងដែរក៏បាន បង្ហោះរូបមួយផ្ទាំង ដែលបានថតជាមួយថ្នាក់ដឹកនាំនៃអតីតគណបក្សសង្រ្គោះជាតិ ដោយបានសរសេរថា៖
«ថ្ងៃនេះទី១៦សីហា ខ្ញុំនៅប្រទេសម៉ាឡេស៊ី ហើយបានជួប ជាមួយយុវជនខ្មែរមកពីប្រទេសកម្ពុជា។ ក្នុងចំណោម នេះ មាន លោកស្រីមួសុខហូ និងអេង ឆៃអ៊ាង អនុប្រធាននៃអតីតគណបក្សសង្រ្គោះជាតិ។ រូបថតដែលបង្ហោះតាមហ្វេសបុកនេះ ក៏បង្ហាញពីការសាទររបស់យុវជន ដែលបានជួបលោកសមរង្ស៊ី។»
វីដេអូរបង្ហោះដោយផេក លោក សម រង្សុី
ទាំង លោក សមរង្ស៊ី លោក អេងឆៃអ៊ាង និងលោកស្រី មូ សុខហួរ បើទោះជាមានដីកាចាប់ខ្លួន ពួកគាត់បានប្ដេជ្ញាថានឹងវិលកម្ពុជាវិញ យ៉ាងយូរនៅអំឡុងខែកញ្ញា ឆ្នាំ២០១៩នេះ ហើយថា វត្តមានរបស់ពួកគាត់គឺដើម្បីទប់ស្កាត់កុំអោយ សហភាពអឺរ៉ុប ដកប្រព័ន្ធអនុគ្រោះពន្ធEBA ពីកម្ពុជា។ តែបើតាមស្ថានភាពនេះ លោកសមរង្ស៊ី ដែលជាមុខសញ្ញាខ្លាំងជាងគេ នៃការចាប់ខ្លួនដោយអាជ្ញាធរកម្ពុជា គឺវត្តមានរបស់ លោកនៅលើទឹកដីម៉ាឡេស៊ី ជាប្រទេសជិតខាងកម្ពុជា ហាក់ដូចជាប្រាប់ថា លោកកំពុងរុលចូលទឹកដីកម្ពុជាហើយនៅពេលនេះ ។
គេមិនដឹងថា នៅពេលនេះ រដ្ឋាភិបាលម៉ាឡេស៊ីអនុវត្តតាមការអំពាវនាវរបស់ អគ្គស្នងការនគរបាលជាតិ និងក្រសួងមហាផ្ទៃកម្ពុជា ដែលបានសុំអោយសហគមន៍អន្តរជាតិ ជួយឃាត់ខ្លួនលោកសមរង្ស៊ី ឬយ៉ាងណានោះទេ ។
ទាក់ទិនវត្តមានរបស់លោកសមរង្ស៊ី លើទឹកដីម៉ាឡេស៊ី ទីដែល អាជ្ញាធរប្រទេសនេះ ធ្លាប់ឃាត់ខ្លួន លោកហេងពៅ អតីតស្នងការនគរបាលរាជធានីភ្នំពេញមកអោយអាជ្ញាធរកម្ពុជា កាលពីជាងមួយទសវត្ស មកនេះ គឺ ទាំងអ្នកនាំពាក្យក្រសួងមហាផ្ទៃ និងអ្នកនាំពាក្យរាជរដ្ឋាភិបាល បាននិយាយនៅក្នុងបទសម្ភាសជាមួយវិទ្យុស្ត្រីនៅថ្ងៃនេះថា ការចាប់ខ្លួន ពិតជាកើតមានអោយតែអ្នកនយោបាយនោះមកដល់កម្ពុជាភ្លាម។ ប៉ុន្តែនៅពេលសួរថាតើ កម្ពុជា និងក្រសួងមហាផ្ទៃ ត្រូវស្នើសុំ អោយ ម៉ាឡេស៊ីជួយឃាត់ខ្លួន លោកសមរង្ស៊ី ដែរឬទេ អ្នកនាំពាក្យ ក្រសួងមហាផ្ទៃ លោកខៀវសុភ័គ ពន្យល់ថា លោកសមរង្ស៊ីកាន់លិខិតឆ្លងដែនអឺរ៉ុប គឺជាការលំបាកសម្រាប់ប្រទេសម៉ាឡេស៊ី។
ជាមួយគ្នានេះ លោកផៃស៊ីផាន អ្នកនាំពាក្យរាជរដ្ឋាភិបាល មានប្រសាសន៍ថា លោកមិនចង់ និយាយអំពីឈ្មោះ លោកសមរង្ស៊ីនោះទេ តែលោកថា លោកសមរង្ស៊ី ក្លាយជាអ្នកទោស ទៅហើយ។
អ្នកសង្កេតការណ៍ខ្លះ មើលឃើញថា បើវត្តមានរបស់លោកសម រង្ស៊ី នៅប្រទេសក្នុងតំបន់ នោះគឺជាដំណើរវិលមកវិញ យ៉ាងពិតប្រាកដរបស់មេដឹកនាំបក្សប្រឆាំងមកកម្ពុជា ដោយបានសម្រេចកំណត់យកទី០៩ ខែវិច្ឆិកា ឆ្នាំ២០១៩ ជាថ្ងៃធ្វើមាតុភូមិនិវត្តន៍ទៅកាន់ប្រទេសកម្ពុជាវិញ របស់លោក សម រង្សុី ប្រធានស្តីទីគណៈបក្សសង្រ្គោះជាតិ ។
សម្ដេចនាយករដ្ឋមន្ត្រីធ្លាប់ព្រមានថា បើលោកវិលចូលតាមច្រកព្រំដែន គឺត្រូវត្រៀមកាំភ្លើងយន្តចាំទទួល ហើយវាយខ្នោះ តែម្ដង។ សម្ដេចថា អ្នកណាក៏ដោយ បើគ្មានពិរុទ្ធភាពរបស់តុលាការទេ គឺមិនមានការចាប់ខ្លួនទេ។
តែបែបនេះ គឺយ៉ាងហោចណាស់ សមាជិកសភាអឺរ៉ុប ជិតដល់រូប បានសន្យាអមដំណើរលោកសមរង្ស៊ីវិលចូលកម្ពុជាវិញហើយ ជាមួយគ្នានេះ ក៏មានពលរខ្មែរស័្មគចិត្តរាប់ពាន់នាក់ នៅប្រទេស ជប៉ុន កូរ៉េខាងត្បូង ម៉ាឡេស៊ី និងថៃ ពួកគាត់ក៏សន្យា មកការពារលោកសមរង្ស៊ី ធ្វើមាតុភូមិនិវត្តន៍ចូលកម្ពុជាផងដែរ។
អ្នកវិភាគខ្លះយល់ថា វត្តមានរបស់ លោកសមរង្ស៊ី នៅកម្ពុជា អាចជាការធ្វើមានដំណោះស្រាយ នយោបាយឡើងវិញ៕
