រដ្ឋមន្ត្រី៖ កំណែទម្រង់គុណភាពអប់រំ៥ឆ្នាំ បានធ្វើឱ្យសិស្សផ្លាស់ប្ដូរឥរិយាបថ ១៨០ដឺក្រេ
ភ្នំពេញ៖ ប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៩ រយៈពេល២ថ្ងៃមកនេះ មានបេក្ខជនចំនួនពីរនាក់ប៉ុណ្ណោះ ដែលបានប្រព្រឹត្តល្មើសវិន័យ ដោយលួចយកសំណៅឯកសារ និងទូរសព្ទចូលប្រឡង ហើយត្រូវបានមន្ត្រីក្រសួងអប់រំ ចាប់បាននិងសម្រេចឱ្យធ្លាក់ដោយស្វ័យប្រវត្តិ។ ដ្បិតនៅមានបេក្ខជនលួចប្រព្រឹត្តល្មើសវិន័យក្តី ប៉ុន្តែក្រសួងអប់រំ យុវជន និងកីឡា បានប្រកាសពីលទ្ធផលជោគជ័យនៃដំណើរការប្រឡងបាក់ឌុបនេះ។
រដ្ឋមន្ត្រីក្រសួងអប់រំ លោក ហង់ ជួន ណារ៉ុន ចាត់ទុកបញ្ហាល្មើសវិន័យតែពីរករណីនេះ ជាសញ្ញាបង្ហាញពីភាពវិជ្ជមាននៃដំណើរការកំណែទម្រង់ប្រព័ន្ធអប់រំ។ នោះក៏ព្រោះតែការប្រឡង ដែលធ្លាប់តែពោរពេញទៅដោយការលួចចម្លងតាមរយៈសំណៅឯកសារ នៅក្នុងមណ្ឌលប្រឡងនោះ ប្រែក្លាយមកជាការប្រឡង ដោយពឹងផ្អែកលើសមត្ថភាពខ្លួនច្រើនជាង។
ដោយសារមូលហេតុបែបនេះហើយ ទើបលោករដ្ឋមន្ត្រី ហ៊ានអះអាងថា បេក្ខជនប្រឡង បានផ្លាស់ប្ដូរឥរិយាបថសិក្សាដែលមិនធ្លាប់មាន តាមរយៈកំណែទម្រង់អប់រំ នៃការរឹតបន្តឹងការប្រឡងនេះ។ «ក្នុងចំណោមបេក្ខជនប្រឡង១សែននាក់ មានតែ២នាក់ទេ ដែលលួចមានសំណៅឯកសារ(ល្មើសវិន័យប្រឡង)។ ឆ្នាំទី១ (កំណែទម្រង់អប់រំដំបូង) លោកគ្រូជាអនុរក្ស ត្រូវយកសំណៅឯកសារ ចេញទាំងបាវៗ ពីមណ្ឌលប្រឡង។ ឥឡូវនេះ ទៅមើលនៅក្នុងធុងសំរាម គឺអត់ឃើញមានសំណៅឯកសារទេ គឺគាត់(បេក្ខជនប្រឡង)សុខចិត្តមុនចូលមណ្ឌលប្រឡង ពួកគាត់អាន(មេរៀន)នៅខាងក្រៅ(មណ្ឌលប្រឡង)»។ នេះជាការបញ្ជាក់របស់លោក ហង់ ជួន ណារ៉ុន។
ក្រៅពីករណីបេក្ខជនលួចយកសំណៅឯកសារ និងទូរសព្ទចូលក្នុងបន្ទប់ប្រឡងនេះ ក៏មានបេក្ខនារីនៅសៀមរាបម្នាក់ ដែលក្រសួងសម្រេចឱ្យធ្លាក់ ព្រោះតែមកប្រឡងយឺតនោះ ក៏ជាការអនុវត្តច្បាប់ដ៏ត្រឹមត្រូវ នៃការពង្រឹងគុណភាពអប់រំដែរ។ ប៉ុន្តែការសម្រេចបែបនេះ ត្រូវបានរដ្ឋមន្ត្រីអប់រំ អះអាងថា វាជាការអនុវត្តច្បាប់ តាមយន្តការកំណែទម្រង់អប់រំរបស់ក្រសួង។ បើតាមលោក ហង់ ជួន ណារ៉ុន គោលការណ៍ច្បាប់ យុត្តិធម៌ តម្លាភាព គឺជាមូលហេតុនៃជោគជ័យកំណែទម្រង់អប់រំ ក្រោមពាក្យស្លោកថា «អ្នកចេះគឺជាប់»។
![]()
![]()
![]()