អាជីវករ ដែលលក់ដូរនៅក្នុងផ្សារសិរីសោភ័ណ មានការព្រួយបារម្ភខ្លាចបាត់បងកន្លែងលក់ដូរ
ខេត្តបន្ទាយមានជ័យ ៖ អាជីករលក់ដូរនៅផ្សារសិរីសោភ័ណ ក្នុងក្រុងសិរីសោភ័ណ ប្រហែល៤០០នាក់លើកគ្នាជួបជាមួយអាជ្ញាធរខេត្ត ដើម្បីរកដំណោះស្រាយ បន្ទាប់ពីពួកគាត់បារម្ភខ្លាចបន្លាស់ទីឲ្យពួកគាត់ទៅលក់ទីតាំងផ្សេង នៅពេលឃើញក្រុមការងារមួយទៅពិនិត្យ និងចុចជីភីអែសបរិវេណផ្សារដែលពួកគាត់កំពុងលក់ដូរ ។
ជំនួបរកដំណោះស្រាយនេះ ធ្វើឡើងនៅក្នុងសាលប្រជុំសាលាខេត្តបន្ទាយមានជ័យ កាលពីព្រឹកថ្ងៃទី២៤ សីហា ក្រោមអធិបតីភាពលោកអ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ អភិបាលក្រុងសិរីសោភ័ណ និងមន្ត្រីមកពីមន្ទីរពាក់ព័ន្ធ ក្នុងក្រុងសិរីសោភ័ណ និងខេត្តផងដែរ។ ក្រុមអាជីវករលើកឡើងថាដោយសារ កាលថ្ងៃទី២២ សីហា មានក្រុមការងារមួយបានចុះទៅពិនិត្យផ្សារ ហើយថែមទាំងចុចជីភីអេសជុំវិញបរិវេណផ្សារ ដែលពួកគាត់កំពុងលក់ដូរ ដោយមិនបានបញ្ជាក់ហេតុផល ទើបពួកគាត់មានការព្រួយបារម្ភ ក៏លើកគ្នាជួបអាជ្ញាធរខេត្ត ដើម្បីសាកសួរនិងសំណូមពររកដំណោះស្រាយ។
ពួកគាត់ថា ផ្សារនេះមិនទាន់ចាស់ទ្រុឌទ្រោមដែលត្រូវជួសជុលឬរុះរើធ្វើថ្មីឡើយ ។ ក្តីបារម្ភចំពោះមុខនេះក្រុមអាជីវករបានលើកជាសំណើរយ៉ាងទទូច សុំអាជ្ញាធរខេត្តជួយអន្តរាគមន៍បញ្ឈប់ការរុះរើជួសជុលផ្សារសិន ។ ពួកកាត់លើកឡើងបន្តថា នៅក្នុងព្រះរាជាណាចក្រកម្ពុជា កន្លងមកនៅពេលមានកាកែប្រែ ឬផ្លាស់ប្តូរទីតាំងទៅលក់កន្លែងផ្សេង និងធ្វើឲ្យអាជីវករជួបផលលំបាកគ្រប់បែបយ៉ាង ។
ក្រុមអាជីវករបានលើកឡើងពីសារាចរលេខ08 សរចុះថ្ងៃទី15 សីហា 2016 ស្តីពីការគ្រប់គ្រងផ្សារគ្រប់ប្រភេទនៅទូទាំងប្រទេសរបស់សម្តេចអគ្គមហា សេ នាបតីតេជោ ហ៊ុន សែន ដូចនៅក្នុងចំណុច (ខ) អំពីសិទ្ធិ និងកាតព្វកិច្ចរបស់អាជីវករក្នុងផ្សារចំណុច(គ)វិធានគ្រប់គ្រងផ្ទេរសិទ្ធិរបស់អាជីវករក្នុងផ្សារនិងចំណុច(ឃ)យន្តការគ្រប់គ្រងផ្សារ។
ក្រុមអាជីវករសំណូមពរស្រដៀងគ្នាៗ សុំជួសជុលចំណុចខូចខាតនិងស្តារលូតាមតូបរៀងខ្លួនៗនិងសុំបន្តលក់ដូរ5ឆ្នាំទៀត ដោយមិនបង់ប្រាក់។ ជុំវិញករណីខាងលើ លោកអ៊ុំ រាត្រីអភិបាលខេត្តបន្ទាយមានជ័យលើកឡើងប្រាប់អាជីវករថា ដោយសារអាជ្ញាធរព្រួយបារម្ភពីហានិភ័យកើតឡើង ព្រោះដំបូលផ្សារកន្លែងខ្លះធ្លុះធ្លាយ ហើយប្រព័ន្ធលូកន្លែងខ្លះ ខូចខាតទើបបង្កើតគណៈកម្មការ2ក្រុម ដើម្បីសម្របសម្រួល និងជួសជុលក្រោយពីចុះពិនិត្យជាក់ស្តែង នាពេលកន្លងមក។
លោកបន្តថា ផ្សារសិរីសោភ័ណផុតសុពលភាពពីកាគ្រប់គ្រងរបស់ក្រុមហ៊ុនតាំងពីថ្ងៃទី1ឧសភា2018ហើយថា ផ្សារដដែលនេះត្រូវគ្រប់គ្រងដោយរដ្ឋវិញ ។
