ទទារយំឆ្លង ពន្យុះលោក សម រង្ស៊ី ចូលស្រុក
ភ្នំពេញ៖ «ទទារយំឆ្លងត្រយ៉ងបងអឺយច្បាស់ហើយ សង្សាបងអឺយ៩វិច្ចិកា»។ នេះជាបទចម្រៀងថ្មី និងជាស្នាដៃថ្មីស្របតាមស្ថានការណ៍នយោបាយកម្ពុជា ដែលតាក់តែងឡើងដោយសម្ដេចនាយករដ្ឋមន្ត្រី ហ៊ុន សែន ឆ្លើយតបទៅលោក សម រង្ស៊ី មេដឹកនាំអតីតគណបក្សសង្គ្រោះជាតិ។
ការប្រកាសវិលចូលស្រុកនៅថ្ងៃទី៩ វិច្ចិកាខាងមុខ របស់លោក សម រង្ស៊ី នេះ បានបង្កើតជាគំនិតមួយ ដែលអាចឱ្យសម្ដេច ហ៊ុន សែន មានពេលវេលានិពន្ធបានបទចម្រៀងថ្មី លើទំនុកភ្លេងចាស់ តាមន័យនយោបាយ សម្រាប់ចំអកគ្នាទៅវិញទៅមក។
ក្នុងន័យបទ «ទទារយំឆ្លង២០១៩» នេះ គឺប្រមុខរដ្ឋាភិបាល តាក់តែងឡើងដើម្បីពន្យុះឱ្យលោក សម រង្ស៊ី ចូលស្រុកតាមការសន្យា ខណៈដែលពន្ធនាគារកំពុងបើកទ្វារចំហររង់ចាំ មេដឹកនាំអតីតបក្សប្រឆាំងរូបនេះ។
«អូនសូមអង្វរបងកុំប្តូរចិត្ត គួរតែអាណិតអ្នកដែលរង់ចាំ សូម្បីតែគុកក៍ចេះផ្តែផ្តាំ សូមបងស៊ូទ្រាំធ្វើតាមសន្យា»។ នេះជាឃ្លាចុងក្រោយនៃបទចម្រៀង «ទទារយំឆ្លង២០១៩» ដែលលោកនាយករដ្ឋមន្ត្រីកម្ពុជា ខំចំណាយពេលគិតគូតែងនិពន្ធ ដើម្បីឱ្យក្រុមចម្រៀងគ្រួសារ យកទៅរៀបចំជាមួយភ្លេង ហើយច្រៀងកម្សាន្ត។
លោក សម រង្ស៊ី និង ថ្នាក់ដឹកនាំប្រឆាំង ប្រកាសថា នឹងវិលមកកម្ពុជា «នៅថ្ងៃទី៩ ខែវិច្ឆិកា ឆ្នាំ២០១៩» ចំថ្ងៃបុណ្យឯករាជ្យជាតិលើកទី៦៦។ការកំណត់កាលបរិច្ឆេទនៃការមាតុភូមិនិវត្តនេះ ធ្វើឡើងបន្ទាប់ពីគណៈកម្មាធិការអចិន្ត្រៃយ៍នៃអតីតគណបក្សប្រឆាំង បើកកិច្ចប្រជុំ កាលពីថ្ងៃទី១៦ ខែសីហានេះ។
អត្ថបទទាក់ទង រដ្ឋាភិបាល រក្សាជំហរចាប់លោក សម រង្ស៊ី ពេលចូលស្រុក លោក សម រង្សុី ប្រកាសផ្លូវការ មកកម្ពុជា «នៅថ្ងៃ៩វិច្ឆិកា»
ក្រោយការប្រកាសរបស់លោក សម រង្ស៊ី នេះ សម្ដេច ហ៊ុន សែន ក៏បានប្រកាសក្នុងកិច្ចប្រជុំគណៈកម្មាធិការកណ្តាលគណបក្សប្រជាជនកម្ពុជា ដោយបញ្ជាឱ្យសមត្ថកិច្ច ត្រៀមអនុវត្តដីកាចាប់ខ្លួនលោក សម រង្ស៊ី រួមទាំងមេដឹកនាំអតីតបក្សប្រឆាំងផ្សេងទៀត ដែលមានឈ្មោះក្នុងដីកាតុលាការ ។ ចំពោះអ្នកដែលគ្មានទោស សមត្ថកិច្ច នឹងមិនចាប់ឡើយ។ នេះបើតាមលោក សុខ ឦសាន អ្នកនាំពាក្យគណបក្សប្រជាជន ៕
![]()
![]()
![]()