នរគបាលបាលជាតិត្រៀមកម្លាំង ចាប់លោកសម រង្សី ពេលត្រឡប់ចូលមកស្រុកខ្មែរវិញ
ភ្នំពេញៈ អគ្គស្នងការនគរបាលជាតិ លោក នេត សាវឿន និងលោក វង្ស ពិសេន អគ្គមេបញ្ជាការកងយោធពលខេមរភូមិន្ទ បានដឹកនាំកិច្ចប្រជុំរួមគ្នាមួយកាលពីព្រឹកថ្ងៃព្រហស្បតិ៍ម្សិលមិញ ដើម្បីត្រៀមកម្លាំងអនុវត្តដីការបស់តុលាការ ត្រៀមចាប់ខ្លួនលោក សម រង្ស៊ី ក្នុងករណីដែលលោក សម រង្ស៊ី វិលត្រឡប់ចូលមកកម្ពុជាវិញ ដូចដែលលោកបានប្រកាស។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានថ្លែងប្រាប់ខ្មែរជាយដែន កាលពីថ្ងៃម្សិលមិញយ៉ាងដូច្នេះថា៖ «ប្រជុំព្រឹកមិញយើងពិគ្រោះគ្នាដើម្បីរៀបចំផែនការអនុវត្តតាមសាលដីកាតុលាការចាប់ខ្លួនពួកក្រុមឧទ្ទាមក្រៅច្បាប់ដែលគាត់ប្រកាសថា នឹងវិលមកប្រទេសវិញនេះ»។
«ចំពោះថាវិលមកពេលណា យើងអត់ខ្វល់ទេព្រោះផែនការបស់យើង គាត់មកពេលណាក៏បាន។ មិនមកជារឿងរបស់គាត់ តែបើមកពេលណាយើងអនុវត្តផែនការយើងបានពេលហ្នឹង។ ផែនការយើង គឺមានភាពបត់បែន។ ដោយឡែកផែនការយើងរបៀបណានោះសុំអធ្យាស្រ័យនេះជាអាថ៌កំបាំងវិជ្ជាជីវៈមិនអាចជម្រាបបានទេ គ្រាន់តែថាមានផែនការ នឹងចាត់វិធានការតាមសាលដីកាដោយប្រើប្រាស់ឲ្យអស់លទ្ធភាពទាំងកម្លាំង ទាំងមធ្យោបាយគ្រប់វិធី»។
កាលពីខែមីនា ចៅក្រមស៊ើបសួរនៃសាលាដំបូងរាជធានីភ្នំពេញបានចេញដីកាឲ្យសមត្ថកិច្ចចាប់ខ្លួនមន្ត្រីជាន់ខ្ពស់អតីតគណបក្សសង្គ្រោះជាតិ ដែលកំពុងនៅក្រៅប្រទេសចំនួន ៨ រូប រួមមានប្រធានស្ដីទីអតីត CNRP លោក សម រង្ស៊ី អនុប្រធានបក្សលោកស្រី មូរ សុខហួរ និងលោក អេង ឆៃអ៊ាង អតីតតំណាងរាស្ត្រ លោក ឡុង រី, ម៉ែន សុថាវរិន្ទ្រ, អ៊ូ ច័ន្ទរឹទ្ធិ, តុ វ៉ាន់ចាន់ និងលោក ហូរ វ៉ាន់។ អ្នកទាំង ៨ រូប ត្រូវបានចៅក្រមស៊ើបសួរលោក កូយ សៅ ចេញដីកាចាប់ខ្លួនពីបទ «រួមគំនិតក្បត់» និង «ញុះញង់ឲ្យប្រព្រឹត្តបទឧក្រិដ្ឋជាអាទិ៍»។
ការចេញដីកានេះពាក់ព័ន្ធនឹងការប្រជុំគណៈកម្មការអចិន្រៃ្តយ៍បក្សសង្គ្រោះជាតិ ដែលត្រៀមរៀបចំដំណើរមាតុភូមិនិវត្តន៍របស់លោក សម រង្ស៊ី មកកម្ពុជាវិញ។ កាលពីពេលថ្មីៗនេះ សមាជិកសភាអឺរ៉ុប ៦ រូប បានប្រកាសថា ពួកគេនឹងអមដំណើរលោក សម រង្ស៊ី និងថ្នាក់ដឹកនាំអតីតគណបក្សសង្គ្រោះជាតិផ្សេងទៀតមកកម្ពុជាវិញ។
ពាក់ព័ន្ធចំណុចនេះ លោក ឆាយ គឹមខឿន ថ្លែងថា បើទោះអ្នកទាំងនោះបានប្រកាសថាហែហមមកក៏ដោយ ក៏ការពិតជាក់ស្ដែងមិនទាន់ដឹងទេ ហើយបើពួកគេមក ក៏មិនអាចពាក់ស្លាកសញ្ញាថា មកការពារមន្ត្រី CNRP ដែរ។
លោក គឹមខឿនថ្លែងថា៖ «បើមកក្នុងនាមបុគ្គល បើសិនជាគាត់ត្រូវបានច្បាប់អនុញ្ញាតឲ្យចូលស្រុកបានក៏ចូលទៅ ព្រោះពួកគាត់អត់មានស្ថិតនៅក្រោមអំណាចតុលាការខ្មែរទេ។ តែបើគាត់មក គាត់ធ្វើសកម្មភាពប្រឆាំងដីកាតុលាការកម្ពុជា អាហ្នឹងបានន័យថាប្រឆាំងច្បាប់កម្ពុជា យើងនឹងចាត់វិធានការតាមនីតិវិធី»។
ចំពោះអ្នកដែលហែរហមអតីតថ្នាក់ដឹកនាំ CNRP លោក ឆាយ គឹមខឿន ថ្លែងថា៖ «ខ្ញុំបានចេញប្រកាសព័ត៌មានរួចហើយផ្សព្វផ្សាយដល់សាធារណជន ប្រជាពលរដ្ឋឲ្យចៀសឆ្ងាយ កុំលង់ជាមួយការញុះញង់របស់ក្រុមទាំងនេះ ព្រោះអំពើមកគាំទ្រពួកឧទ្ទាមនេះ បានន័យថា ជាអំពើប្រឆាំងនឹងអំណាចដីកាតុលាការ បានន័យថា ជាអំពើខុសច្បាប់ ហើយបើខុសច្បាប់ ច្បាប់នឹងចាត់ការគាត់តាមផ្លូវច្បាប់ហើយ»។
លោកស្រី មូរ សុខហួរ អនុប្រធានអតីតគណបក្សសង្គ្រោះជាតិបានថ្លែងថា៖ «យើងមិនភ័យខ្លាចដោយការគំរាមចាប់ខ្លួននេះទេ។ សម្តេច ហ៊ុន សែន នឹងរុញឲ្យសហភាពអឺរ៉ុបដកឱកាសទាំងស្រុងរបស់កម្ពុជាក្នុងការទទួលបានផលប្រយោជន៍ពីប្រព័ន្ធ EBA។ ផលប្រយោជន៍ជាតិ ត្រូវតែការពារ មិនមែនផលប្រយោជន៍បុគ្គលទេ។ តើអគ្គស្នងការត្រូវការពេលប៉ុន្មានទៀតក្នុងការពិភាក្សាគ្នា? ការពិភាក្សាទាំងអស់នេះគ្រាន់តែជាការគំរាមកំហែងជាសាធារណៈមិនឲ្យមនុស្សរាប់ពាន់នាក់មកស្វាគមន៍ការវិលត្រឡប់នេះ»៕
![]()
![]()
![]()