កម្ពុជាទទូចទៅ UN ឱ្យវាយតម្លៃស្ថានភាពសិទ្ធិមនុស្សនៅកម្ពុជាកុំលម្អៀង
តំណាងកម្ពុជាប្រចាំនៅអង្គការសហប្រជាជាតិ ទទូចទៅការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សឱ្យអនុវត្តអាណត្តិរបស់ខ្លួន ដោយអព្យាក្រិតមិនលម្អៀង តបតាមគោលការណ៍ធម្មនុញ្ញអង្គការសហប្រជាជាតិ។
ស្ថានបេសកកម្មអចិន្ត្រៃយ៍កម្ពុជាប្រចាំនៅអង្គការសហប្រជាជាតិ និងអង្គការអន្តរជាតិនានានៅទីក្រុងហ្សឺណែវ បានលើកឡើងក្នុងលិខិតចុះថ្ងៃទី១០ខែកញ្ញា ស្តីពីរបៀបវារៈកិច្ចប្រជុំលើកទី៤២ របស់ក្រុមប្រឹក្សាសិទ្ធិមនុស្សនៅហ្សឺណែវថា ការផ្តល់អាទិភាពឱ្យតែក្រុមមួយ ហើយមើលរំលងក្រុមផ្សេងៗទៀត ក្នុងការរិះគន់សិទ្ធិមនុស្សកម្ពុជាថា បានបន្ទាបតម្លៃគោលការណ៍អព្យាក្រឹតភាពរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស។
លិខិតដដែលបញ្ជាក់ថា រដ្ឋាភិបាលកម្ពុជា ធ្លាប់បានប្រកាសយ៉ាងច្បាស់នៅចំពោះមុខក្រុមប្រឹក្សាសិទ្ធិមនុស្ស កាលពីថ្ងៃទី៤ ខែកក្កដាថា សិទ្ធិមនុស្ស ប្រជាធិបតេយ្យ និងនីតិរដ្ឋនៅកម្ពុជា គួរត្រូវបានវាយតម្លៃជារួមជាជាងពឹងផ្អែកលើករណីដាច់ដោយឡែក។
ស្ថានបេសកកម្មរបស់កម្ពុជាលើកឡើងទៀតថា៖ «យើងសូមទទូចឱ្យការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សអនុវត្តអាណត្តិរបស់ខ្លួនដោយមិនលម្អៀង អព្យាក្រឹត និងច្បិចយកបញ្ហាតែមួយជ្រុង ព្រមទាំងប្រកាក់ខ្ជាប់ឱ្យបានម៉ឺងម៉ាត់នូវគោលការណ៍នៃធម្មនុញ្ញអង្គការសហប្រជាជាតិ»។
ការទទូចរបស់តំណាងរដ្ឋាភិបាលកម្ពុជានេះ ធ្វើឡើងក្រោយអ្នកជំនាញសិទ្ធិមនុស្សអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោកស្រី រ៉ូណា ស្មីត (Rhona Smith) ថ្លែង បើកកិច្ចប្រជុំក្រុមប្រឹក្សាសិទ្ធិមនុស្សលើកទី៤២នេះថា លំហរប្រជាធិបតេយ្យ និងសិទ្ធិមនុស្សនៅកម្ពុជារយៈពេលមួយឆ្នាំក្រោយការបោះឆ្នោតជាតិឆ្នាំ២០១៨ គ្របដណ្ដប់ទៅដោយការគាបសង្កត់សិទ្ធិនយោបាយ។
របាយការណ៍កម្រាស២០ទំព័រ ដែលលោកស្រី Rhona Smith ដាក់ជូនក្រុមប្រឹក្សាអង្គការសហប្រជាតិ បានសរសេរផងដែរ ពីការយាយីទៅលើអតីតមន្ត្រីបក្សប្រឆាំង និងមេដឹកនាំ ។
ក្នុងនោះលោកស្រី លើកឡើងពីអតីតមេបក្សប្រឆាំង លោក កឹម សុខា នៅតែស្ថិតក្នុងការឃុំឃាំងសិទ្ធិនយោបាយ ខណៈដែលគណបក្សប្រជាជនកម្ពុជាកាន់អំណាចផ្តាច់មុខ៕
![]()
![]()
![]()