លោកអភិបាលខេត្តកំពង់ឆ្នាំង សម្តេចតេជោ អាចនឹងដកតំណែងរូបលោក ឆាប់ៗនេះ ព្រោះលួចដីរដ្ឋ៨ទីតាំង
ភ្នំពេញ៖ ប្រមុខរាជរដ្ឋាភិបាល បានចាត់ឲ្យរដ្ឋមន្ត្រីក្រសួងរៀបចំដែនដី និងរដ្ឋមន្ត្រីក្រសួងធន ធានទឹក ចុះទៅពិនិត្យដោះស្រាយករណីលោក ឈួរ ច័ន្ទឌឿន ពាក់ព័ន្ធភាពមិនប្រក្រតីមួយចំនួនក្នុងការទន្ទ្រានកាន់កាប់ដីធ្លីទ្រព្យសម្បត្តិរដ្ឋ និងដីបន្ទាយយោធាដល់ទៅ៨ទីតាំងយកធ្វើជាកម្មសិទ្ធិរបស់ខ្លួន។ តាមរយៈលិខិតរបស់ទីស្ដីការគណៈរដ្ឋមន្ត្រី ចុះថ្ងៃទី០៤ ខែកញ្ញា ឆ្នាំ២០១៩ បានតម្រូវឲ្យរដ្ឋមន្ត្រីក្រសួងរៀបចំដែនដី និងរដ្ឋមន្ត្រីក្រសួងធនធានទឹក ចាត់វិធានការដោះស្រាយករណីរបស់លោក ឈួរ ច័ន្ទឌឿន ដែលទន្ទ្រានកាន់កាប់ដីរដ្ឋយកធ្វើជាកម្មសិទ្ធិផ្ទាល់ខ្លួន។
ប្រភពពីមន្ត្រីរាជការនៅក្នុងសាលាខេត្តកំពង់ឆ្នាំង បានឲ្យដឹងទៀតថា លោក ឈួរ ច័ន្ទឌឿន អភិបាលខេត្តកំពង់ឆ្នាំង ទំនងចៀសមិនផុតពីត្រូវរបូតតំណែងក្នុងពេលឆាប់ៗខាងមុខនេះ ឡើយ ព្រោះរឿងអាស្រូវច្រើនបែបច្រើនយ៉ាងរបស់លោក ឈួរ ច័ន្ទឌឿន ត្រូវបានដឹងឮដល់ប្រមុខរាជរដ្ឋាភិបាលរួចទៅហើយ។
ប្រភពដែលស្និទ្ធនឹងលោក ឈួរ ច័ន្ទឌឿន បានឲ្យដឹងថា ចាប់តាំងពីទទួលបានតំណែងជាអភិបាលខេត្តកំពង់ឆ្នាំង រួចមកគឺលោក ឈួរ ច័ន្ទឌឿន មិនយកតួនាទីរបស់ខ្លួនដើម្បីធ្វើការងារបម្រើប្រយោជន៍ប្រជាពលរដ្ឋឬបម្រើប្រយោជន៍ជាតិនោះឡើយ។ មានការរិះគន់ចំៗថា កន្លងមកនៅក្នុងខេត្តកំពង់ឆ្នាំង មានបទល្មើសទន្ទ្រានកាន់កាប់ដីព្រៃលិចទឹក ក៏ដូចជាបទល្មើសទន្ទ្រានកាន់កាប់ដីព្រៃរបស់រដ្ឋ ព្រមទាំងបទល្មើសនេសាទប្រើឧបករណ៍ខុសច្បាប់កើតឡើងយ៉ាងរាលដាល ប៉ុន្តែលោក ឈួរ ច័ន្ទឌឿន មិនយកចិត្តទុកដាក់ទប់ស្កាត់ឬបង្ក្រាបប្រកបដោយប្រសិទ្ធភាពនោះទេ។ ផ្ទុយទៅវិញលោក ឈួរ ច័ន្ទឌឿន គិតតែពីរឿងប្រើអំណាច ក៏ដូចជាតួនាទីរបស់ខ្លួនធ្វើសកម្មភាពទន្ទ្រានកាន់កាប់ដីធ្លីទ្រព្យសម្បត្តិរដ្ឋជាច្រើនកន្លែងក្នុងក្រុងកំពង់ឆ្នាំង និងតាមបណ្ដាស្រុកនានាយកធ្វើជាកម្មសិទ្ធិរបស់ខ្លួនយ៉ាងក្រអឺតក្រទម។
ក្រោយពេលរឿងអាស្រូវរបស់ខ្លួនបានដឹងឮដល់ថ្នាក់ដឹកនាំកំពូល គឺលោក ឈួរ ច័ន្ទឌឿន កំពុងភ័យស្លន់ស្លោយ៉ាងខ្លាំងព្រោះដឹងថា ខ្លួនចៀសមិនផុតពីរបូតតំណែងក្នុងពេលឆាប់ៗខាងមុខនេះឡើយ។ ប្រភពបានឲ្យដឹងទៀតថា រឿងអាស្រូវរបស់លោក ឈួរ ច័ន្ទឌឿន មិនអាចបិទបាំងតទៅទៀតបានទេ ព្រោះបណ្ដាញព័ត៌មាននានាបានចុះផ្សាយជាបន្ត បន្ទាប់ ហើយបង្ហាញចេញនូវឯកសារនិងភស្ដុតាងជាច្រើនយ៉ាងច្បាស់ក្រឡែតផងដែរ។
ជុំវិញបញ្ហានេះ ប្រជាពលរដ្ឋនិងមន្ត្រីរាជការក្នុងខេត្តកំពង់ឆ្នាំង បានលើកឡើងថា ប្រសិនបើថ្នាក់ដឹកនាំក្រសួងមហាផ្ទៃ ក៏ដូចជាប្រមុខរាជរដ្ឋាភិបាលកម្ពុជា ដកលោក ឈួរ ច័ន្ទឌឿន ចេញពីតំណែងអភិបាល ខេត្តកំពង់ឆ្នាំង ឲ្យបានកាន់តែឆាប់គឺកាន់តែល្អដើម្បីជាការព្រមានដល់អភិបាលខេត្តដទៃផងដែរ កុំឲ្យយកតម្រាប់តាមលោក ឈួរ ច័ន្ទឌឿន ដែលគិតតែប្រ យោជន៍ផ្ទាល់ខ្លួន៕
