ស្នងការនគរបាលភ្នំពេញ សម្រេចផ្អាកការងារអធិការរងខណ្ឌឫស្សីកែវបណ្តោះអាសន្ន ពាក់ព័ន្ធករណីគំរាមសម្លាប់
ភ្នំពេញ៖ ទីបំផុត ឧត្តមសេនីយ៍ឯក ស ថេត អគ្គស្នង ការរងនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាក់ប្រាប់ ខ្មែរជាយដែនថា លោក បានសម្រេចដាក់ពិន័យខាងកងកម្លាំង និងផ្អាកការងារបណ្តោះអាសន្នចំពោះលោក ចាន់ ពៅ អធិការរងខណ្ឌឫស្សីកែវ ពាក់ព័ន្ធករណីគំរាមសម្លាប់នាយផ្នែកចរាចរណ៍ខណ្ឌឫស្សីកែវ លោក លី រ៉ូហ្សាត ។
ការសម្រេចដាក់ពិន័យកងកម្លាំង និងផ្អាកការងារបណ្តោះអាសន្ននេះ គឺក្រោយពេលដែលលោក ចាន់ ពៅ អធិការរងខណ្ឌឬស្សីកែវ បានផ្ញើរសារគំរាមសម្លាប់នាយផ្នែកចរាចរណ៍ខណ្ឌ ដោយគ្រាន់តែអន្តរាគមន៍ដោះលែងអ្នកស្រវឹងម្នាក់មិនបាន ។
បើតាមប្រភពព័ត៌មានច្បាស់ការណ៍មួយ បានឱ្យដឹងថា មុនពេលកើតហេតុ នៅយប់ថ្ងៃទី២ ខែកញ្ញា កម្លាំងអធិការដ្ឋាននគរបាលខណ្ឌឬស្សីកែវ បានដាក់គោលដៅត្រួតពិនិត្យអាវុធជាតិផ្ទុះនិងជាតិស្រវឹង នៅតាមបណ្ដោយផ្លូវជាតិលេខ៥ មុខវិទ្យាល័យឫស្សីកែវ ស្ថិតក្នុងភូមិសាមគ្គី សង្កាត់ឫស្សីកែវ ខណ្ឌឫស្សីកែវ ដែលមានលោកស្នងការរង និងលោកអធិការរងទទួលផ្នែកចរាចរណ៍ជាអ្នកដឹកនាំបញ្ជា ។
បន្ទាប់ពីអនុវត្ដបានប្រហែលជាកន្លះម៉ោង កម្លាំងសមត្ថកិច្ចខណ្ឌឫស្សីកែវ បានពិនិត្យឃើញ អ្នកមានជាតិស្រវឹង លើសកម្រិតចំនួន ៣នាក់ ដែលជាអ្នកបើកម៉ូតូ ក្នុងនោះ មានម្នាក់មិនបានសហការផ្លុំទេ ។ បន្ទាប់មក កម្លាំងសមត្ថកិច្ច ក៏បានធ្វើការបញ្ជូនទៅស្នងការដើម្បីចាត់ការតាមផ្លូវច្បាប់ ។
បន្ទាប់ពីបញ្ជូនបានមួយសន្ទុះ ស្រាប់តែលោក ចាន់ ពៅ អធិការរងនគរបាលខណ្ឌឫស្សីកែវ បានទូរសព្ទមកលោកនាយផ្នែក ដោយបញ្ជាឱ្យដោះលែងមនុស្សម្នាក់ ដែលមានជាតិស្រវឹងលើសកម្រិត ។ ក៏ប៉ុន្ដែ លោកនាយផ្នែក បានប្រាប់ទៅវិញថា គាត់គ្មានសិទ្ធិដោះលែងទេ គាត់គ្រាន់តែជានាយផ្នែក ហើយក៏ឱ្យលោកអធិការរងរូបនោះ ទូរសព្ទទៅលោកអធិការងទទួលផ្នែកចរាចរណ៍ ដែលកំពុងដឹកនាំទៅ ស្រាប់តែលោកអធិការរងរូបនោះ បានបិទទូរសព្ទ ទាំងខឹងយ៉ាងខ្លាំង ។
លោក ចាន់ ពៅ អធិការរងនគរបាលខណ្ឌឬស្សីកែវ
មួយសន្ទុះក្រោយមក ស្រាប់តែឃើញបុរសម្នាក់ ដែលមានជាតិស្រវឹងលើស ក្នុងចំណោម៣នាក់ដែលកម្លាំងសមត្ថកិច្ចបញ្ជូនទៅស្នងការនោះ ត្រឡប់មក វិញយ៉ាងរំភើយ ។
ក្រោយមក លោកអធិការរងរូបនេះ បានផ្ញើសារសម្លេងគំរាមសម្លាប់ជាច្រើន មកលោកនាយផ្នែក ធ្វើឱ្យលោកនាយផ្នែក មានការភិតភ័យយ៉ាងខ្លាំង ព្រោះអីធ្លាប់ដឹងហើយថា កន្លងមកអធិការរងរូបនេះធ្លាប់ បាញ់គំរាមមន្ត្រីប៉ូលីសរួចមកហើយ គ្មាននរណាហ៊ានធ្វើអ្វីលោកអធិការរងរូបនេះឡើយ ធ្វើឱ្យលោកអធិការរងរូបនេះ ឡើងចាងគំរាមសម្លាប់គេឯងជាបន្ត បន្ទាប់ ។
មានការលើកឡើងថា លោក ចាន់ ពៅ អធិការរងខណ្ឌឫស្សីកែវ ដែលជាអ្នកកាន់ច្បាប់បែរជាល្មើសច្បាប់ទៅវិញ ហ៊ានគំរាមសម្លាប់លោក លី រ៉ូហ្សាត ជានាយផ្នែកចរាចរណ៍ខណ្ឌឫស្សីកែវ គ្រាន់តែរឿងបន្តិចបន្ទួចសោះ ៕
