បើទោះបីជាចិនទៅស្រុកវិញក៏ដោយ ក៏មិនប៉ះពាល់ដល់វិស័យអចលនទ្រព្យកម្ពុជានោះទេ
កម្ពុជាត្រូវបានចាត់ទុកថាជាប្រទេសកំពុងអភិវឌ្ឍន៍ គ្រប់វិស័យទាំងអស់គឺមានការជឿនលឿននិងកំពុងបន្ដចក្ខុវិស័យយ៉ាងសកម្ម។ក្នុងនោះផងដែរ តូឯកសំខាន់ដែលកំពុងពុះកញ្ជ្រោលនោះគឺវិស័យដីធ្លី ដែលកំពុងជោគជ័យខ្លាំងនិងមានអ្នកវិនិយោគគ្រប់ជាតិសាសន៍។
ជាក់ស្ដែង មានមតិមួយចំនួនពោលថា ការកើនឡើងនៃតម្លៃដី ដោយសារមានវិនិយោគិនចិនច្រើនដែលមកធ្វើការវិនិយោគឬបានឥទ្ធិពលពីជនជាតិចិនតែ ប៉ុណ្ណោះ។ តាមពិតទៅនៅកម្ពុជាមានវិនិយោគិនជាជនជាតិដទៃជាច្រើនដែលកំពុងមានសកម្មភាព ដោយសារតែជនជាតិចិនមានភាពសកម្មច្រើន ព្រមទាំងមករកស៊ីច្រើនផ្នែក ទើបមានការលើកឡើងបែបនេះ។
ថ្មីៗនេះមានព័ត៌មានពីការចាកចេញរបស់ជនជាតិចិន ដែលធ្វើឱ្យមានអ្នកដីធ្លីមិនតិចទេកំពុងភ័យខ្លាចនូវការធ្លាក់ចុះនៃតម្លៃដី ដោយជាក់ស្ដែងសកម្មភាពចាកចេញនោះជារឿងធម្មតាប៉ុណ្ណោះ តាមការលើកឡើងពីមន្រ្តីជំនាញ ហើយជនជាតិទាំងអស់ដែលចាកចេញភាគច្រើនជាអ្នករកស៊ីតាមអនឡាញខុសច្បាប់និងកម្មករសំណង់។ដូច្នេះវិស័យដីធ្លីនៅស្រុកយើងដើរស្រាប់ ទោះមិនមានជនជាតិចិនក្ដី ក៏មិនធ្វើឱ្យប៉ះពាល់ខ្លាំងណាស់ណាដែរ។
តាមការលើកឡើងពីអ្នកជំនាញក្នុងវិស័យអចលន ទ្រព្យលោកច្រឹក សុខនីម បានបញ្ជាក់យ៉ាងច្បាស់ថា វិស័យដីធ្លី មិនថានៅពេលបច្ចុប្បន្ន ក៏ដូចជាពេលអនាគតនោះទេ សន្ទស្សន៍នៃតម្លៃគឺនៅតែមានកំណើនជានិច្ច ដែលវាមិនទាន់មានសញ្ញាអវិជ្ជមានណាមួយបង្ហាញនៅឡើយនោះទេ។
ជាក់ស្ដែងនៅពេលបច្ចុប្បន្ននេះយើងឃើញស្រាប់ហើយថា ចំពោះតម្លៃដីធ្លី គឺកំពុងតែមានកំណើនជាបន្តបន្ទាប់ ដែលក្នុងនោះរាប់ទាំងដីនៅក្នុងតំបន់ក្រុង ក៏ដូចជានៅជាយក្រុង ហើយនៅតាមបណ្តាខេត្តសក្ដានុពលមួយចំនួន ក៏កំពុងកើនឡើងយ៉ាងគំហុកផងដែរ ដូចជា ខេត្តព្រះសីហនុ កំពត កោះកុង បាត់ដំបង និងក្រុងប៉ោយប៉ែត ។
ចំពោះវិបត្តិសេដ្ឋកិច្ចដែលអាចកើតឡើងឬអត់ វាមិនទាន់មកដល់នៅឡើយទេ ហើយកម្ពុជាក៏មិនប្រឈមបញ្ហាធ្ងន់ធ្ងរនោះដែរ ដោយសារទីផ្សារកម្ពុជាបានពង្រីកជាមួយបណ្តាប្រទេសកាន់តែច្រើន (ក្រៅពីចិន) ដូចជា ជប៉ុន កូរ៉េ និងបណ្តាប្រទេសក្នុងតំបន់អាស៊ាន ហេតុនេះវាមិនមានអ្វីគួរឲ្យបារម្ភឡើយ។
ដូច្នេះទោះមានជនជាតិចិនច្រើនវិលទៅកាន់ស្រុកកំណើតវិញក៏ដោយ ក៏មិនមានអ្វីរាំងស្ទះដល់វិស័យដីធ្លីនៅកម្ពុជាដែរ ពីព្រោះប្រទេសយើងជាប្រទេសកំពុងអភិវឌ្ឍន៍ ហើយដីធ្លីមានចរន្ដខ្លាំង តម្លៃគឺកើនឡើងគ្រប់ពេល មិនមានអ្វីគួរឱ្យបារម្ភឡើយ។
![]()
![]()
![]()