សម្តេចតេជោ ហ៊ុន សែន បញ្ជាអោយចាប់ខ្លួន អ្នកធ្វេីទារុណកម្ម រហូតអោយពលរដ្ឋម្នាក់ស្លាប់ នៅបន្ទាយមានជ័យ
បន្ទាយមានជ័យ៖សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាអោយមានការចាប់ខ្លួនអ្នកដែលធ្វេីទារុណកម្ម បណ្តាលអោយពលរដ្ឋម្នាក់ស្លាប់ នៅខេត្តបន្ទាយមានជ័យ ។
សម្តេចតេជោ ហ៊ុន សែន បញ្ជាបែបនេះ ក្នុងឱកាសជួបជុំអ្នកសារព័ត៌មានជិត៦ពាន់នាក់ នៅកោះពេជ្រ នាល្ងាចថ្ងៃទី១៤ ខែមករា នេះ ។
សម្ដេចនាយករដ្ឋមន្រ្តីបានថ្លែងដូច្នេះថា៖«ខ្ញុំបានបញ្ជាទៅលោក កែវ រ៉េមី និងលោក សៅ សុខា ឲ្យចាត់តាំងគណៈកម្មការស្រាវជ្រាវបន្ទាន់ លើបញ្ហាថាមានមនុស្សស្លាប់នៅខេត្តបន្ទាយមានជ័យដោយសារការធ្វើទារុណកម្ម។ បើសិនជាដូច្នោះមែន អ្នកដែលធ្វើឲ្យគេរបួសស្នាមរហូតដល់ស្លាប់ ត្រូវតែចាប់មកផ្ដន្ទាទោសឲ្យខានតែបាន»។
សូមបញ្ជាក់ថា អ្នកដែលស្លាប់នេះ មានឈ្មោះ ទុយ ស្រស់ អាយុ៣៤ឆ្នាំ មានទីលំនៅ ក្នុងភូមិជ្រៃ ឃុំ សឹង្ហ ស្រុកអូរជ្រៅ ខេត្តបន្ទាយមានជ័យ ត្រូវបានចាប់ខ្លួននៅក្នុងសកម្មភាពតវ៉ារឿងដីធ្លី នៅមុខសាលាខេត្តបន្ទាយមានជ័យ កាលពីថ្ងៃទី២៨ ខែធ្នូរ ឆ្នាំ២០១៩ ថ្មីៗនេះ ។
ក្រុមគ្រួសារនៃសពអះអាងថា ការស្លាប់របស់ឈ្មោះ ទុយ ស្រស់ គឺ ព្រោះតែការធ្វើទារុណកម្មរយៈពេល៣ថ្ងៃ នៅទីបញ្ជារការកងរាជអាវុធហត្ថខេត្តបន្ទាយមានជ័យ ។
ទោះបីយ៉ាងណា បញ្ហានេះ រដ្ឋបាលខេត្តបន្ទាយមានជ័យ ក៏បានចេញសេចក្តីប្រកាសព័ត៌មាន បំភ្លឺ ផងដែរ ៕
![]()
![]()
![]()