សំណុំរឿង កឹម សុខា ក្បត់ជាតិ គឺមិនមែនជាករណីពិសេស, ការផ្សាយផ្ទាល់ពីសវនាការ គឺជារឿងខុសច្បាប់
ភ្នំពេញ ៖ លោក គី តិច មេធាវីតំណាងរាជរដ្ឋាភិបាលកម្ពុជា បានបញ្ជាក់នៅវេលាថ្ងៃត្រង់ ថ្ងៃទី២២ ខែមករា ឆ្នាំ២០២០នេះថា សំណុំរឿងក្បត់ជាតិរបស់លោក កឹម សុខា គឹមិនមែនជាករណីពិសេសឡើយ ដូច្នេះ ការទាមទារណាមួយឲ្យមានការផ្សាយផ្ទាល់ពីទិដ្ឋភាពសវនាការរបស់សាលាដំបូងរាជធានីភ្នំពេញ គឺជារឿងខុសច្បាប់។
លោកមេធាវី បានមានប្រសាសន៍ដូច្នេះ ក្រោយពីមានលើកឡើងពីសាធារណជន ដែលចង់ឲ្យមានការផ្សាយផ្ទាល់តាមកញ្ចក់ទូរទស្សន៍ ឬនៅលើបណ្តាញទំនាក់ទំនងសង្គមហ្វេសប៊ុក ពីទិដ្ឋភាពទាំងស្រុងនៃអង្គសវនាការ ដូចសវនាការជំនុំជម្រះក្តីកូនកាត់ គឺសាលាក្តីខ្មែរក្រហម ដែលសហការជាមួយអង្គការសហប្រជាជាតិ។
លោកបានអះអាងថា ការលើកឡើងបែបនេះ គឺខុសនឹងច្បាប់របស់ព្រះរាជាណាចក្រកម្ពុជា ព្រោះជនជាប់ចោទ កឹម សុខា គឹជាពលរដ្ឋម្នាក់ ដែលមានសិទ្ធិស្មើគ្នា ដូចពលរដ្ឋទូទៅដែរ។
លោក គី តិច បានមានប្រសាសន៍ដូច្នេះថា «ការផ្សាយផ្ទាល់តាមកញ្ចក់ទូរទស្សន៍ជាតិ ឬតាមហ្វេសប៊ុក គឹមិនអាចធ្វើបានទេ ព្រោះវាខុសនឹងច្បាប់ ដែលចែងថា ពលរដ្ឋគ្រប់រូបមានសិទ្ធិស្មើគ្នា នៅចំពោះច្បាប់។ ករណីលោក កឹម សុខា មិនមែនជាករណីពិសេសទេ។ បើអនុញ្ញាតឲ្យផ្សាយផ្ទាល់ ជនជាប់ចោទផ្សេងទៀត នឹងទាមទារឲ្យធ្វើដូច្នេះដែរ»។
សវនាការនាព្រឹកនេះ គឺផ្តោតទៅលើសកម្មភាពនយោបាយក្បត់ជាតិរបស់លោក កឹម សុខា ដដែលដូចសវានាការ កាលពីសប្តាហ៍មុន ដែលសកម្មភាពទាំងនោះ មាននៅក្នុងវីដេឃ្លីបផ្សេងៗ បង្ហាញពីជនបរទេសគាំទ្រទាំងមធ្យោបាយ បច្ចេកទេស និងធនធានហិរញ្ញវត្ថុ ដើម្បីរៀបចំផែនការនេះ។ ចំណែកនៅពេលរសៀលថ្ងៃនេះ សវនាការនឹងចាប់ដំណើរការជាបន្តទៀត។
សូមរំឭកថា មេធាវីការពាររដ្ឋាភិបាល កាលពីថ្ងៃទី១៥ ខែមករា ឆ្នាំ២០២០ បានប្រាប់អ្នកសារព័ត៌មានថា យ៉ាងហោចណាស់ មានប្រទេស៩ ពាក់ព័ន្ធនឹងសំណុំរឿងរបស់លោក កឹម សុខា រួមមាន ឥណ្ឌូណេស៊ី យូហ្គោស្លាវី ស៊ែប៊ី អូស្រ្តាលី អាមេរិក កាណាដា សហភាពអឺរ៉ុប តៃវ៉ាន់ និងឥណ្ឌា។ ក្រៅពីនេះ ក៏មានពាក់ព័ន្ធអង្គការអន្តរជាតិ និងបុគ្គលជាជនបរទេសមួយចំនួនទៀតដែរ តែលោកសុំមិនបញ្ចេញឈ្មោះ។
ចៅក្រមនៅក្នុងសវនាការសំណុំរឿងអ្នកនយោបាយក្បត់ជាតិនេះ មានលោក កូយ សៅ ប្រធានក្រុមប្រឹក្សាជំនុំជម្រះ ដោយមានចៅក្រមប្រឹក្សា ២រូបទៀត គឺលោក សេង លាង និងលោក ធាម ច័ន្ទពិសិដ្ឋ។ រីឯតំណាងអយ្យការអមសាលាដំបូងរាជធានីភ្នំពេញ មានលោកព្រះរាជអាជ្ញារងពីររូប គឺលោក វង្ស ប៊ុនវិសុទ្ធ និងលោក ប្លង់ សុផល។
ចំណែកមេធាវីបួនរូប មានលោក ផែង ហេង, លោក ចាន់ ចេន, លោក ផាន់ ចាន់សាក់ និងលោកស្រី ម៉េង សុធារី គឺជាមេធាវីការពារសិទ្ធិលោក កឹម សុខា នៅក្នុងសវនាការនេះ។ រីឯក្រុមមេធាវីរបស់រាជរដ្ឋាភិបាល ដឹកនាំដោយលោកមេធាវី គី តិច៕
![]()
![]()
![]()