សម្តេច ស ខេង៖ ត្រូវប្រើមន្ត្រីឲ្យអស់លទ្ធភាព បើទំនេរចោល គឺខាតបង់ថវិកាជាតិ
នាពិធីសម្ពោធ និងប្រកាសដាក់ឲ្យដំណើរការជាផ្លូវការ ការិយាល័យច្រកចេញចូលតែមួយ និងការិយាល័យប្រជាពលរដ្ឋ រាជធានី-ខេត្ត នៅរដ្ឋបាលខេត្តពោធិ៍សាត់ ព្រឹកថ្ងៃទី២២ ខែមករា សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានលើកឡើងថា រដ្ឋត្រូវប្រើមន្ត្រីឲ្យអស់លទ្ធភាព ដើម្បីបម្រើសេវាកម្មជូនប្រជាពលរដ្ឋ ព្រោះបើមន្ត្រីទំនេរចោល ជាការខាតបង់ថវិកាជាតិ។
«អាស្រ័យលើស្ថានភាពជាក់ស្ដែងនៃមូលដ្ឋាន ពោលគឺបើមិនទាន់មានតម្រូវការស្នើសុំសេវាច្រើន រដ្ឋមិនទាន់បង្កើតច្រកចេញតែមួយឡើយ គឺមិនអាចបង្កើតហើយយកមន្ត្រីទៅចាំបំពេញការងារដោយទំនេរចោលនោះទេ ព្រោះវាគឺជាការខាតបង់ថវិកាជាតិ ដែលថវិកានេះក៏ដូចជាថវិកាពលរដ្ឋដែរ»។ នេះជាការបញ្ជាក់របស់សម្តេច ស ខេង ដោយស្នើឲ្យមន្ត្រីជំនាញទាំងអស់ប្រមូលផ្តុំគ្នាធ្វើការដើម្បីបម្រើសេវារដ្ឋបាលសាធារណៈសម្រាប់ប្រជាពលរដ្ឋ។
សម្តេចឧបនាយករដ្ឋមន្ត្រី បានស្នើឲ្យពន្លឿនការងារសមាហរណកម្មការិយាល័យនៃអង្គភាពជំនាញ ក៏ដូចជាការផ្ទេរបុគ្គលិក ចូលក្នុងរចនាសម្ព័ន្ធ ច្រកចេញចូលតែមួយ ក៏ដូចជាការិយាល័យប្រជាពលរដ្ឋ ដោយមិនឲ្យមន្ត្រីទាំងនោះ បាត់បង់ប្រយោជន៍របស់ខ្លួនរហូតដល់ចូលនិវត្តន៍។ សម្តេចបានលើកឡើងពីផលវិបាកនៃការធ្វើការងារបែកខ្ញែកគ្នា ដោយមានការិយាល័យច្រើន ប៉ុន្តែមិនសូវមានមនុស្សធ្វើការ។
«ការិយាល័យច្រកចេញចូលតែមួយ និងការិយាល័យប្រជាពលរដ្ឋដែលសម្ពោធនាថ្ងៃនេះ គឺជាសមិទ្ធផលថ្មីមួយទៀតនៃគោលនយោបាយវិមជ្ឈការ និងវិសហមជ្ឈការ ដែលរាជរដ្ឋាភិបាលដាក់ចេញដើម្បីបង្ករលក្ខណៈងាយស្រួល និងឆ្លើយតបតាមសំណូមពរ ពេលវេលា ព្រមទាំងតម្រូវការរបស់ប្រជាពលរដ្ឋ»។ នេះជាការបញ្ជាក់របស់សម្តេច ស ខេង នាពិធីនៅពោធិ៍សាត់។
បើតាមសម្តេច យន្តការច្រកចេញចូលតែមួយ បានទទួលការគាំទ្រ និងវាយតម្លៃខ្ពស់ពីសំណាក់អ្នកប្រើប្រាស់សេវា ដោយសារបានកាត់បន្ថយជាអតិបរមានូវការិយាធិបតេយ្យ និងអំពើពុករលួយក្នុងដំណើរការសុំសេវាផ្សេងៗពីស្ថាប័នរដ្ឋ។
កម្ពុជាបានអនុវត្តសាកល្បងនូវដំណើរការច្រកចេញចូលតែមួយនេះ រយៈពេល១៥ឆ្នាំរួចមកហើយ ដោយចាប់ផ្ដើមដំបូងនៅស្រុកក្នុងខេត្តបាត់ដំបង និងខេត្តសៀមរាប ដោយមានការគាំទ្រពីរដ្ឋបាលស្រុកនៅអាល្លឺម៉ង់ និងអ៊ីតាលី ។
បច្ចុប្បន្ន ក្រសួងមហាផ្ទៃ រួមជាមួយក្រសួងពាក់ព័ន្ធ ពង្រីកការិយាល័យនេះនៅតាមបណ្ដាក្រុងស្រុកជាបន្តបន្ទាប់ គិតត្រឹមឆ្នាំ២០១៩ មានថ្នាក់ក្រុងស្រុកខណ្ឌចំនួន១១៥រួចមកហើយ ។ ទន្ទឹមនឹងការបង្កើតការិយាល័យច្រកចេញចូលតែមួយ ក្រសួងមហាផ្ទៃ ក៏បង្កើតការិយាល័យប្រជាពលរដ្ឋមួយទៀតដែរ ដែលមានតួនាទីទទួល សម្របសម្រួល និងដោះស្រាយពាក្យបណ្ដឹង ឬការតវ៉ានានារបស់ប្រជាពលរដ្ឋ ពាក់ព័ន្ធនឹងការសម្រេចរបស់រដ្ឋបាលមូលដ្ឋាន ភាពមិនប្រក្រតីនៃការផ្ដល់សេវា ឬការបញ្ចេញអកប្បកិរិយាមិនសមរម្យណាមួយពីមន្ត្រីក្នុងពេលផ្ដល់សេវាជូនប្រជាពលរដ្ឋ។
សម្ដេច ស ខេង បានមានប្រសាសន៍ទៀតថា ការិយាល័យច្រកចេញតែមួយ និងការិយាល័យប្រជាពលរដ្ឋរបស់រាជធានីខេត្តទូទាំងប្រទេស បានដំណើរការផ្ដល់សេវាជិត៦០០ប្រភេទសេវា ហើយថ្មីៗនេះ រាជរដ្ឋាភិបាលក៏បានចេញអនុក្រឹត្យពាក់ព័ន្ធនឹងការផ្ទេរមុខងារ និងធនធានមួយចំនួនពីថ្នាក់ជាតិមកឲ្យថ្នាក់ក្រោមជាតិ ព្រមទាំងបានកែសម្រួលរចនាសម្ព័ន្ធរដ្ឋបាលក្រងស្រុក និងបង្កើនថវិកាឃុំសង្កាត់នៅឆ្នាំ២០២០ដែរ ដោយក្នុងនោះថវិកាអភិវឌ្ឍន៍មូលដ្ឋានមានជាង៧ម៉ឺនដុល្លារ ដើម្បីធានាឲ្យឃុំសង្កាត់បំពេញបានតាមតម្រូវការជាក់ស្ដែងក្នុងមូលដ្ឋាន៕
![]()
![]()
![]()