សម្តេចក្រឡាហោម ស ខេង ព្រមានមន្ត្រីធំៗថា បើឡើងធ្វើធំ ដើម្បីប្រយោជន៍ខ្លួនឯង មិនបាច់ឡើងទេ
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានលើកឡើងនៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០១៩ និងទិសដៅការងារឆ្នាំ២០២០ នាព្រឹកថ្ងៃអង្គារ ទី២១ ខែមករា ឆ្នាំ២០២០នេះថា៖ «ឡើងធ្វើធំ ដើម្បីការពារប្រយោជន៍ខ្លួនឯង មិនបាច់ឡើងទេ»។
នៅចំពោះមុខមន្ត្រីរាជការ និងកម្លាំងសមត្ថកិច្ចមកពីស្ថាប័នស្ថិតនៅក្រោមគណៈកម្មាធិការជាតិសុវត្ថិភាពចរាចរណ៍ផ្លូវគោក សម្តេចក្រឡាហោម ស ខេង បានលើកឡើងបន្តថា៖ «រដ្ឋមន្ត្រីខ្លះធ្វើការខ្លាចតែបាត់អំណាច និងបាត់សិទ្ធិរបស់ខ្លួន លើការងារមួយចំនួន ដែលជាហេតុធ្វើឱ្យការងារអន្តរក្រសួងខ្លះមិនសូវមានប្រសិទ្ធភាព។
ខ្ញុំថាយើងគេឱ្យឡើងធ្វើធំហ្នឹង ដើម្បីការពារផលប្រយោជន៍ប្រជាជន ចុះបើឡើងមកគ្រាន់តែការពារផលប្រយោជន៍ខ្លួនឯងដដែលមិនបាច់ឡើងទេ។ ឡើងមកគ្រាន់តែខ្លាចបាត់អំណាចខ្លួនឯង មិនបាច់ឡើង មិនបាច់ធ្វើទេ។ ធ្វើការពារជាតិ ការពារប្រជាពលរដ្ឋ អាណុងភារកិច្ចរបស់យើង។
ការទទួលបានតួនាទី និងអំណាចក្នុងជួររាជរដ្ឋាភិបាល ឬជាមន្ត្រីរាជការ គឺដើម្បីការពារផលប្រយោជន៍របស់ប្រជាជន មិនមែនដើម្បីការពារផលប្រយោជន៍ខ្លួនឯងនោះឡើយ។ បើឡើងធ្វើធំ ដើម្បីតែការពារផលប្រយោជន៍ខ្លួនឯងមិនបាច់ឡើងក៏បានដែរ»៕
