អាជ្ញាធរនិងជំនាញណាខ្លះ? ត្រូវប្រឈមមុខផ្លូវច្បាប់ករណីបាក់អគារ៧ជាន់នៅខេត្តកែប
រាជធានីភ្នំពេញ៖ ដំណោះស្រាយចំពោះមុខ គឺ អាជ្ញាធរពាក់ព័ន្ធទាំងអស់ ដែលដឹកនាំបញ្ជាផ្ទាល់ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កំពុងខិតខំយ៉ាងខ្លាំងក្លា ដើម្បីជួយសង្គ្រោះជនរងគ្រោះដែលសុទ្ធសឹងជាកម្មករ ចេញពីគំនរបាក់បែក នៃអគារកម្ពស់៧ជាន់ នៅខេត្តកែប ។
ការបាក់រលំអគារនេះ បានកើតឡើងកាលពីរសៀលថ្ងៃទី៣ ខែមករា ដែលកន្លងទៅ នៅខេត្តព្រះសីហនុ ក៏ធ្លាប់មានករណីនេះផងដែរ រហូតធ្វើអោយកម្មករ២៨នាក់បានស្លាប់ ។
យោងតាមសេចក្តីប្រកាសព័ត៌មានរបស់រដ្ឋបាលខេត្តកែប បង្ហាញថា គិតត្រឹមវេលាម៉ោង៥ ព្រឹកថ្ងៃទី៤ ខែមករា មនុស្ស២៣នាក់ បានជួយសង្គ្រោះចេញពីគំនរបាក់បែកនេះ ។ ប៉ុន្តែជាអកុសលមនុស្ស៥នាក់ ដែលមានស្ត្រី៣នាក់ បានស្លាប់យ៉ាងអាណោចអាធ័ម ។
នៅពេលនេះ មជ្ឈដ្ឋានជាច្រើន ចង់ដឹងថា អាជ្ញាធររូបណាខ្លះ ឬ ជំនាញណាខ្លះ នឹងត្រូវទទួលខុសត្រូវផ្លូវច្បាប់ចំពោះករណីដ៏សោកសង្រេង មួយនេះ។
ចំណែកឯលោកផែង វណ្ណៈបានបង្ហោះសារនៅព្រឹកថ្ងៃទី០៤ខែមករាឆ្នាំ២០២០ថារកឃេីញកំហុសសង់ខុសលិខិតអនុញ្ញាតតាំងពីខែធ្នូ ២០១៩ ហេតុអ្វីមិនបញ្ឈប់ការសាងសង់ ?
នៅថ្ងៃទី ៥ ខែ ធ្នូ ឆ្នាំ ២០១៩ មន្ទីររៀបចំដែនដី នគរូបនីយកម្ម និង សំណង់ ខេត្តកែប បានចុះពិនិត្យសំណង់អាគារនោះឃេីញថា សង់ខុសពីលិខិតអនុញ្ញាត ។ ក្នុងលិខិតអនុញ្ញាតអោយសង់តែកំពស់ ៥ ជាន់ទេ តែម្ចាស់សំណង់សង់ឡេីងបន្តរហូតដល់ ៧ ជាន់ បណ្ដាលអោយបាក់រលំនៅថ្ងៃទី ៣ ខែ មករា ឆ្នាំ ២០២០ តែម្ដង ។
ការរកឃេីញកំហុសសាងសង់តាំងពីថ្ងៃទី ៥ ខែ ធ្នូ ឆ្នាំ ២០១៩ មិនព្រមចេញលិខិតផ្អាក ឬ បញ្ឈប់ការសាងសង់ ហេីយនៅតែបន្តអោយសាងសង់ គឺជាកំហុសដ៏ធ្ងន់ធ្ងររបស់លោក វ៉ៅ សុខា ប្រធានមន្ទីររៀបចំដែនដី នគរូបនីយកម្ម និងសំណង់ខេត្តកែប ។ ការបិទភ្នែកអោយបន្តសាងសង់ទាំងខុសលិខិតអនុញ្ញាតនេះត្រូវបានគេសង្ស័យថាជាប់ពាក់ព័ន្ធនឹងអំពេីពុករលួយ ។
យេីងរង់ចាំមេីលថាតេី មន្ត្រីណាខ្លះពាក់ព័ន្ធនឹងករណីបាក់រលំអគារនៅខេត្តកែបដែលបណ្ដាលអោយស្លាប់មនុស្ស និង របួសច្រើននាក់នោះ ។
