សម្តេច នឹងចេញទៅខេត្តកែប នៅបន្តិចទៀតនេះ ដើម្បីដឹកនាំកម្លាំងរុករកសង្រ្គោះកម្មករដែលកំពុងជាប់ នៅក្រោមអាគារដែលដួលរលំ

សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជាមុននេះបន្តិច តាមរយៈទំព័រហ្វេសបុក បានឲ្យដឹងថា​ សម្តេចនឹងចេញទៅខេត្តកែបនៅ ពេលបន្តិចទៀតនេះដើម្បីចូលរួមដឹកនាំការរុករកសង្រ្គោះកម្មករដែលកំពុងជាប់ នៅក្រោមអាគារដែលដួលរលំ៕

គួរបញ្ជាក់ផងដែរថា ស្នងការនគរបាលខេត្តកែប លោកឧត្តមសេនីយ៍ត្រី បែន ដារា បានឱ្យដឹងថា ជនរងគ្រោះប្រមាណ ៧នាក់ហើយ ត្រូវបានយកចេញពីគំនរអគារ ហើយត្រូវបានបញ្ជូនទៅសង្គ្រោះនៅមន្ទីរពេទ្យ។ ជនរងគ្រោះទាំង៧នាក់នេះ រងរបួសធ្ងន់ស្រាល។

 

សូមបញ្ជាក់ថា អគារកម្ពស់៧ជាន់ ស្ថិតនៅក្បែរវត្តសមាធិ ក្នុងក្រុងកែប ខេត្តកែប បានបាក់រលំនៅវេលាម៉ោងប្រមាណ ៤៖៣០នាទីល្ងាចថ្ងៃទី០៣ ខែមករា ឆ្នាំ២០២០នេះ។ អគារនេះត្រូវបានគេអះអាងថា សាងសង់រួចរាល់ប្រមាណជា ៩០ភាគរយហើយ។

 

បើតាមលោកស្នងការនគរបាលខេត្តកែប បានឱ្យដឹងថា អគារនេះបាក់រលំពេលកម្មករកំពុងចាក់ប្លង់សេនៅជាន់ទី៧។ លោកស្នងការ បានឱ្យដឹងដែរថា មានកម្មករប្រមាណជា ៣០នាក់ ស្ថិតនៅក្នុងអគារនេះពេលដួលរំលំនោះ។