លោក ញឹក ប៊ុនលេខប្រធានការិយាល័យគយច្រកទ្វារតំបន់បឹងត្រកួន បានឃុបឃិតគ្នាជាមួយឈ្មួញ ប្រព្រឹត្តអំពើពុករលួយ ធ្វើអោយបាត់បង់ចំណូលជាតិ
ខេត្តបន្ទាយមានជ័យ៖ ប្រភពពីឈ្មួញរកសុីទំនិញដែលស្និទ្ធនឹងលោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន បានឲ្យដឹងថា ការដែលលោក ញឹក ប៊ុនលេខ ហ៊ានធ្វើអ្វីៗតាមអំពើចិត្ត គឺមានការសម្របសម្រួលពីសំណាក់មន្ត្រីគយធំៗក្នុងខេត្តបន្ទាយមានជ័យ និងក្រុមគយចល័តផងដែរ។ ចំណែកលោក នូ សុីថា ប្រធានសាខាគយខេត្តបន្ទាយមានជ័យ បានរក្សាភាពស្ងៀមស្ងាត់ទុកឲ្យលោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន បង្កើនសកម្មភាពប្រព្រឹត្តអំពើពុករលួយតាមអំពើចិត្ត។
ហេតុនេះហើយទើបមានសេចក្តីអំពាវនាវឲ្យលោកបណ្ឌិតគុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា ចាត់វិធានការទប់ស្កាត់អំពើពុករលួយរបស់លោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន ខ្លះផង។ ដោយហេតុថាមួយរយៈចុងក្រោយនេះលោក ញឹក ប៊ុនលេខ ឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងគំហុកដោយសារអាងមានខ្នងបង្អែកដ៏រឹងមាំ។
ប្រភពពីមន្ត្រីពាក់ព័ន្ធនៅច្រកទ្វារតំបន់បឹងត្រកួន ស្រុកថ្មពួក ខេត្តបន្ទាយមានជ័យ បានឲ្យដឹងថា បច្ចុប្បន្ននេះលោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន ប្រើតួនាទីនិងអំណាចរបស់ខ្លួនប្រព្រឹត្តអំពើពុករលួយខ្លាំងក្លាជាងមុនទៅទៀត។ ប្រភពបានឲ្យដឹងទៀតថា លោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន ឃុបឃិតឲ្យឈ្មួញធំៗ នាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗដោយគ្មានញញើតអ្វីទាំងអស់។ ជាងនេះទៅទៀតនៅច្រករបៀងក្បែរៗច្រកទ្វារតំបន់បឹងត្រកួន លោក ញុឹប ប៊ុនលេខ បានចាត់កូនចៅជំនិតម្នាក់អោយឃ្លាំមើលទំនិញដែលចេញចូលតាមច្រករបៀងចំការគ ដើម្បីប្រមូលប្រយោជន៍ជូនលោក ដែលឈ្មួញទាំងនោះតែងតែនាំដូចជា ចូលម៉ូតូ និងរថយន្តចង្កូតស្តាំស៊េរីទំនើបៗអត់ពន្ធនិងទំនិញខុសច្បាប់យ៉ាងពេញបន្ទុកដែរ ព្រោះលោក ញឹក ប៊ុនលេខ គិតតែពីរឿងប្រមូលលុយដាក់ហោប៉ៅយ៉ាងត្រជាក់ចិត្ត។
សមត្ថកិច្ចពាក់ព័ន្ធនៅច្រកទ្វារតំបន់បឹងត្រកួនបានបង្ហើបឲ្យដឹងថា លោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន មិនត្រឹមតែឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់តាមអំពើចិត្តប៉ុណ្ណោះទេ គឺថែមទាំងឃុបឃិតកែឯកសារបន្លំប្រភេទទំនិញទៀតផង។ ទន្ទឹមនឹងនេះលោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន តែងប្រើឈ្មោះលោកនូ សុីថា ដើម្បីបិទបាំងទង្វើមិនប្រក្រតីនិងរឿងអាស្រូវពុករលួយរបស់ខ្លួនយ៉ាងក្រអឺតក្រទម។ ដូច្នេះលោកបណ្ឌិត គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា និងលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ គួរចាត់វិធានការទប់ស្កាត់អំពើពុករលួយរបស់លោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន ជាបន្ទាន់។
![]()
![]()
![]()