សម្តេច ហ៊ុន សែន ចាត់ទុកថា បើអ្នកណា បន្តបង្ហោះព័ត៌មានមិនពិតពី វីរុស កូវីដ-១៩ អ្នកនោះជាភារវៈករ
បើជនណាឬក្រុមណា នៅតែបន្តប្រឌិតព័ត៌មានមិនពិតពីជំងឺកូវីដ-១៩ (COVID-19) សម្តេចនាយករដ្ឋមន្រ្តី ហ៊ុន សែន នឹងចាត់ទុកពួកគេ ថាជា «ភេរវករ»។
ក្នុងពិធីចែកសញ្ញាបត្រជូននិស្សិតនៃសាកលវិទ្យាល័យអាស៊ីអឺរ៉ុប នាព្រឹកថ្ងៃទី២ ខែមីនា ឆ្នាំ២០២០ ប្រមុខរដ្ឋាភិបាល ថ្លែងដូច្នេះថា៖«ការបង្ហោះព័ត៌មានដ៏អាក្រក់ពីជនទុច្ចរិត ដែលឥឡូវខ្ញុំកូរណាខ្ញុំ បានដើរដល់ចំណុចថា អ្នកឯងជាជនទុច្ចរិត នៅខាងមុខ ខ្ញុំ នឹងចាត់ទុកថា អ្នកឯងជា ពួកភេរវករ»។
ប្រមខុរដ្ឋាភិបាល បកស្រាយថា ករណីជនបរទេស២-៣នាក់ ដួលស្លាប់នៅកម្ពុជានាពេលថ្មីៗនេះ មិនមែនដោយសារជំងឺកូវីដ-១៩ទេ។ ប្រមុខរដ្ឋាភិបាល និយាយថា៖«ដើរទៅសួរលើពិភពលោកទៅ ដែលមានអ្នកស្លាប់ ទៅជាអ៊ីចឹងទេ?»។
ទន្ទឹមនឹងនេះ មេដឹកនាំកម្ពុជា ចោទជាសំណួរទៅកាន់អ្នកប្រឌិតព័ត៌មានពីជំងឺកូវីដ-១៩ ថា៖«តើអ្នកឯងទទួលបានអីមកវិញ?»។ មេដឹកនាំរូបនេះ បន្តថា៖«អ្នកឯង គ្រាន់តែបង្កភាពភ័យខ្លាច សម្រាប់ប្រជាពលរដ្ឋនិងសម្រាប់ក្រុមគ្រួសាររបស់អ្នកឯង»។
អត្ថបទទាក់ទង ក្រសួងសុខាភិបាល ស្នើឱ្យពលរដ្ឋជឿជាក់លើខ្លួន ខណៈក្រសួងព័ត៌មាន ចាត់វិធានការអ្នកផ្សព្វផ្សាយប្រឌិតពីCOVID-19
យ៉ាងណា សម្តេចនាយករដ្ឋមន្រ្តី មានជំនឿថា ផ្សព្វផ្សាយព័ត៌មានក្លែងក្លាយពីជំងឺកូវីដ-១៩ មិនអាចធ្វើឲ្យប្រជាពលរដ្ឋកម្ពុជា តក់ស្លុត ហើយលែងគ្រប់គ្រងខ្លួនឯងបាននោះទេ។ ជាមួយគ្នានេះ សម្តេច បានអំពាវនាវឲ្យប្រជាពលរដ្ឋ ចូលរួមប្រយុទ្ធប្រឆាំងនឹងការផ្សព្វផ្សាយព័ត៌មានក្លែងក្លាយនេះ។
ប្រមុខរដ្ឋាភិបាល ផ្តល់ជាយោបល់ថា៖«បើគេថា ខ្មែរឈឺអស់ហើយ ព្រះតេជគុណ បង្ហោះវិញទៅថា អាត្មាអត់ឈឺអីទេ។ [បើគេថា] ប្រជាជនកម្ពុជា ឈឺអស់ហើយ យើង មានហ្វេសប៊ុក បង្ហោះវិញថា ខ្ញុំ អត់មានឈឺអីទេ លេងអ្ហែងចេះវិញ។ អ្នកឯងថា ឈឺ ខ្ញុំថា មិន...ចុះបើយើងអត់ឈឺមែន»។
ប្រមុខរដ្ឋាភិបាល អះអាងជាថ្មីថា មកដល់ពេលនេះ ពុំទាន់មានប្រជាពលរដ្ឋខ្មែរណាម្នាក់ ឆ្លងឬបាត់បង់ជីវិតដោយសារជំងឺកូវីដ-១៩ឡើយ៕
![]()
![]()
![]()