បន្ទាប់ពីបុរសម្នាក់ដែលឆ្លងកូវីដ១៩៖ពេលនេះអាជ្ញាធរខេត្តសៀមរាបបើកកិច្ចប្រជុំជាមួយភាគីពាក់ព័ន្ធ ខណៈភ្ញៀវស្ងប់ស្ងាត់
សៀមរាប៖អាជ្ញាធរខេត្តសៀមរាបនៅព្រឹកថ្ងៃអាទិត្យនេះបានបើកកិច្ចប្រជុំពិសេសមួយ ជាមួយក្រុមអ្នករកស៊ីខាងវិស័យទេសចរណ៍ ក្រោយមានករណីបុរសអាយុ៣៨ឆ្នាំម្នាក់ត្រូវបានរកឃើញថា បានឆ្លងជំងឺកូវីដ១៩ពីជនជាតិជប៉ុន។ ចំណែកសភាពការណ៍ក្នុងខេត្តទេសចរណ៍មួយគឺមានសភាពស្ងប់ស្ងាត់ជាងធម្មតា បើទោះជាអាជ្ញាធរមិនបានហាមប្រាមការជួបប្រជុំឬធ្វើដំណើរក៏ដោយ តែនៅតាមគ្រួសារនីមួយៗមិនអនុញ្ញាតឲ្យសមាជិកជាពិសេសក្មេងៗចេញក្រៅ របងផ្ទះឡើយ។ នេះបើតាមសហជីពវិស័យទេសចរណ៍ប្រចាំខេត្តសៀមរាប។
លោក ម៉ម រិទ្ធី ប្រធានសហជីពវិស័យទេសចរណ៍ និងសេវាកម្មកម្ពុជាប្រចាំខេត្តសៀមរាប បានកត់សំគាល់នៅថ្ងៃអាទិត្យនេះ ខេត្តសៀមរាបមានសភាពស្ងប់ស្ងាត់ខុសធម្មតា ទាំងនៅទីផ្សារដើមក្រឡាញ់ និងផ្សារលើជាដើម។ ភាពស្ងប់ស្ងាត់នេះគឺដោយសារតែពលរដ្ឋមួយចំនួនមានការភ័យខ្លាចក្រោយពីរកឃើញករណីបុរសអាយុ៣៨ឆ្នាំម្នាក់បានឆ្លងជំងឺកូវីដ១៩ពីជនជាតិជប៉ុនដែលធ្លាប់ទៅខេត្តសៀមរាបកាលពីខែកុម្ភៈ។
បើតាមលោក ម៉ម រិទ្ធី នៅតាមគ្រួសារនីមួយៗគឺមិនអនុញ្ញាតឲ្យសមាជិកខ្លួន ជាពិសេសក្មេងៗចេញក្រៅរបងផ្ទះឡើយនៅថ្ងៃអាទិត្យនេះ ខណៈអាជ្ញាធរខេត្តសៀមរាបបញ្ជាក់ថាគ្មានការផ្អាកការធ្វើដំណើរទេសចរណ៍ឬហាមការជួបប្រជុំណាមួយឡើយ។
លោក លី សំរិទ្ធិ អភិបាលរងខេត្តសៀមរាបបានថ្លែងថា អភិបាលខេត្តនេះបានបើកកិច្ចប្រជុំមួយជាមួយក្រុមអ្នករកស៊ីខាងវិស័យទេសចរណ៍នៅថ្ងៃព្រឹកថ្ងៃអាទិត្យដើម្បីស្តាប់យោបល់ពួកគេ ខណៈភ្ញៀវទេសចរណ៍ធ្លាក់ចុះកាន់តែខ្លាំងស្របពេលរកឃើញបុរសខ្មែរម្នាក់ឆ្លងជំងឺកូវីដ១៩នៅខេត្តសៀមរាបនេះ។
ចំណែកការហាមប្រាមធ្វើដំណើរទេចរណ៍ឬការជួបប្រជុំណាមួយក៏គ្មានដែរ គឺមានតែការបិទសាលារៀនបណ្តោះអាសន្ននៅទូទាំងក្រុងសៀមរាបតែប៉ុណ្ណោះ។ នេះជាការបញ្ជាក់របស់លោក លី សំរិទ្ធិ។
សូមបញ្ជាក់ថាក្រសួងអប់រំបានប្រកាសថា សាលារៀនទាំងអស់នៅក្រុងសៀមរាបត្រូវបានផ្អាកជាបណ្តោះអាសន្នចាប់ពីថ្ងៃទី៧ខែមីនាតទៅដោយមិនកំណត់ពេលរហូតដល់មានការជូនដំណឹងជាថ្មី។ ក្រៅពីបិទសាលារៀន ប្រមុខរដ្ឋាភិបាល សម្តេច ហ៊ុន សែន ក៏បានប្រាប់លោករដ្ឋមន្ត្រីក្រសួងសុខាភិបាលដែលធ្វើសន្និសិទកាលពីល្ងាចថ្ងៃទី៧មីនាថា កម្មវិធីអង្គរសង្ក្រាននៅខេត្តសៀមរាបឆ្នាំនេះក៏ត្រូវផ្អាកធ្វើផងដែរ៕
![]()
![]()
![]()