ភ្នំពេញ៖ រដ្ឋមន្ត្រីក្រសួងព័ត៌មានឯកឧត្តម ខៀវ កាញារីទ្ធ ថ្លែងថា ក្រសួងមិនគាំទ្រឱ្យបង្កើតច្បាប់សម្រាប់គ្រប់គ្រងលើព័ត៌មានមិនពិត និងដំណឹងក្លែងក្លាយនោះទេ ដោយលោកយល់ថា ច្បាប់នេះមិនបានការពារផលប្រយោជន៍រួមឡើយ។ ក្នុងពិធីសម្ពោធដាក់ឱ្យប្រើប្រាស់សៀវភៅវិជ្ជាជីវៈសារព័ត៌មានដំណឹងក្លែងក្លាយ និងព័ត៌មានមិនពិត នៅថ្ងៃនេះ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ថ្លែងថា ដើម្បីលុបបំបាត់ព័ត៌មានមិនពិត និងដំណឹងក្លែងក្លាយបាន ទាល់តែមានការចូលរួមពីស្ថាប័នពាក់ព័ន្ធធ្វើការផ្សព្វផ្សាយព័ត៌មានពិតជូនទៅដល់ប្រជាពលរដ្ឋឱ្យបានយល់ដឹង។ លោកបានបញ្ជាក់ទៀតថា បើទោះបីជាក្នុងអំឡុងកូវីដ១៩ កន្លងមក មានការចែករំលែកព័ត៌មានមិនពិត និងដំណឹងក្លែងក្លាយក៏ដោយ ប៉ុន្តែក្រសួងមិនគាំទ្រឱ្យបង្កើតច្បាប់ប្រឆាំងនឹងព័ត៌មានមិនពិត និងដំណឹងក្លែងក្លាយឡើយ។ ឯកឧត្តម ខៀវ កាញារីទ្ធ ថ្លែងថា៖ «កន្លងមក ពេលដែលមានកូវីដ១៩ភ្លាម មានច្រើនណាស់ដែលចង់ឱ្យយើងធ្វើច្បាប់មួយដើម្បីស្ដីអំពីការបង្រ្កាបព័ត៌មានក្លែងក្លាយ ក្រសួងព័ត៌មានយល់ថាមិនចាំបាច់ទេ។ មិនមែនគ្រាន់តែបញ្ហាកូវីដ១៩ឬបញ្ហាអី យើងចេញច្បាប់មួយដើម្បីបង្រ្កាបព័ត៌មានក្លែងក្លាយ ព័ត៌មានមិនពិត។ ហើយកាលណាយើងចេញច្បាប់ ពិបាកនឹងកំណត់ណាស់ ហើយច្បាប់នេះមិនបានការពារផលប្រយោជន៍រួមទេ វានឹងការពារផលប្រយោជន៍បុគ្គល ហើយនឹងអាចក្លាយជាការរំលោភសិទ្ធិសេរីភាពក្នុងការបញ្ចេញមតិ»។ ក្រសួងព័ត៌មានបានបង្កើតគណៈកម្មការមួយកាលពីខែមីនាដើមឆ្នាំនេះដែលមានសមាជិករហូតដល់៥៩រូប សម្រាប់តាមដានការផ្សព្វផ្សាយព័ត៌មានក្លែងក្លាយ។ នៅពេលសាកសួរអំពីចំនួនមនុស្សត្រូវបានចាប់ខ្លួន និងចោទប្រកាន់ពាក់ព័ន្ធនឹងការផលិត ឬចែកចាយព័ត៌មានមិនពិតចាប់តាំងពីក្រោយការបង្កើតក្រុមនេះមកឯកឧត្តម ខៀវ កាញារីទ្ធ ពុំអាចបញ្ជាក់បាននោះឡើយ។ នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព សម្ដែងការគាំទ្រចំពោះការប្ដេជ្ញាចិត្តរបស់រដ្ឋមន្ត្រីព័ត៌មានរូបនេះ ដោយអ្នកស្រីថា ប្រសិនបើមានច្បាប់នេះ វានឹងប៉ះពាល់ដល់សិទ្ធិសេរីភាពបញ្ចេញមតិ។ អ្នកស្រីជំរុញឱ្យរដ្ឋាភិបាល និងស្ថាប័នពាក់ព័ន្ធធ្វើការផ្សព្វផ្សាយ ឬធ្វើការអប់រំដល់អ្នកសារព័ត៌មាន និងប្រជាពលរដ្ឋពីវិជ្ជាជីវៈសារព័ត៌មានជាងការប្រើវិធានការច្បាប់។ អ្នកស្រី ចក់ សុភាព ប្រាប់ថា៖ «អ៊ីចឹង យើងឃើញថា កន្លងមក បើទោះបីយើងមិនទាន់មានច្បាប់គ្រប់គ្រងលើព័ត៌មានក្លែងក្លាយនេះយ៉ាងណាក៏ដោយ គឺយើងឃើញថាមានការប្រើប្រាស់ច្បាប់ដែលមានជាធរមានរួចហើយក្នុងការដូចថានៅពេលមានព្រឹត្តិការណ៍ណាមួយ ឬក៏ការចោទប្រកាន់ណាមួយនោះ គឺមានការប្រើប្រាស់ក្រមព្រហ្មទណ្ឌរួចទៅហើយ ឬក៏ច្បាប់ពាក់ព័ន្ធផ្សេងទៀត»។ អ្នកស្រី ចក់ សុភាព បានឱ្យដឹងថា ក្នុងអំឡុងការរីករាលដាលនៃជំងឺកូវីដ១៩រយៈពេលជាងកន្លះឆ្នាំមកនេះ មានអ្នកសារព័ត៌មាន ប្រជាពលរដ្ឋ រួមទាំងសកម្មជននយោបាយជាង៤០នាក់ហើយ ត្រូវបានចាប់ខ្លួន និងចោទប្រកាន់ពាក់ព័ន្ធនឹងបទផ្សព្វផ្សាយព័ត៌មានមិនពិតនិងបទញុះញង់។ ចាប់ពីខែមេសា ឆ្នាំ២០២០ អ្នកសារព័ត៌មាន៣នាក់ត្រូវបានចាប់ខ្លួនដោយសារការបង្ហោះសារលើបណ្តាញសង្គមហ្វេសប៊ុកដោយការសរសេរ ឬការរាយការណ៍ព័ត៌មានសង្គម ក្នុងនោះមានលោក សុវណ្ណ រិទ្ធី ដែលជាអ្នកសារព័ត៌មានរបស់ TVFB លោក សុខ ឧត្តម ដែលជាអ្នកសារព័ត៌មាននៅខេត្តកំពង់ឆ្នាំង និងចុងក្រោយគឺលោក រស់ សុឃិត៕
ព័ត៌មានគួរចាប់អារម្មណ៍
ពលរដ្ឋ៣ភូមិ នៅស្រុកសណ្ដាន់ រងគ្រោះដោយសារក្រុមហ៊ុន ស៊ីអ ស៊ីខេ ឈូកឆាយរំលោភយកដីពួកគាត់ សុំឲ្យសម្ដេចតេជោជួយអន្តរាគមន៍ (ខ្មែរជាយដែន)
ឆ្នោត សៀមនិងយួន ត្រូវគេបើកលេងម៉ាសេរី នៅទីក្រុងទេសចរណ៍សៀមរាប (ខ្មែរជាយដែន)
រថយន្តធុនធំ ដឹកប្រេងគេចពន្ធ ពីថៃ ចូលកម្ពុជា តាមច្រកជប់គគីរ ម៉ាសេរី (ខ្មែរជាយដែន)
វីដែអូ
ចំនួនអ្នកទស្សនា