ពលរដ្ឋចាំមើលថា តើអាជ្ញាធរ ចាត់វិធានការទៅលើក្រុមហ៊ុនរបស់លោកឧកញ៉ា ឡៅ ប៊ុនប៉ា ដែលបានធ្វើអោយមនុស្សស្លាប់ តើមានការទទួលខុសត្រូវកំរិតណា?
បន្ទាយមានជ័យ៖ ប្រជាពលរដ្ឋនៅក្រុងប៉ោយប៉ែត ខេត្តបន្ទាយមានជ័យ ទន្ទឹងរង់ចាំមើលថា ឧបទ្ទវហេតុបាក់រលំដងសន្ទូចសង្កត់ស្លាប់ និងរងរបួសនៅក្នុងប៉ោយប៉ែត អាចមានវាសនាទទួលបានថវិកា ដូចបាក់អាគារនៅខេត្តកែប និងក្រុងកំពង់សោមដែរឬទេ? ព្រោះអីមហាជនកំពុងតែចង់ឃើញ វិធានការរបស់អាជ្ញាធរខេត្តបន្ទាយមានជ័យ ស្ថាប័នតុលា និងមន្រ្តីជំនាញ អនុវត្តបន្តឹងអាជ្ញាទៅលើក្រុុមហ៊ុន ដែលមានយីហោ(ដឺផាកសុីធីប៉ោយប៉ែត) ជារបស់ឧកញ៉ាឡៅ ប៊ុនប៉ា កាលពីថ្ងៃទី១២ ខែសីហា ឆ្នាំ២០២០ ក្នុងការធ្វេសប្រហែស ធ្វើអោយមនុស្សស្លាប់ចំនួន៥នាក់ និងរបួស៤នាក់ ។
ប្រភពព័ត៌មាន ដែលទទួលបាន បានបញ្ជាក់ថា ក្រុមហ៊ុនសន្ទូចដែលមកស្ទូចសំណង់សាងសង់បុរីរបស់លោក ឧកញ៉ា ឡៅ ប៊ុនប៉ា គឺមានមូលដ្ឋាននៅរាជធានីភ្នំពេញ គឺមកមុនកើតហេតុ១សប្ដាយ៍បានខូចសន្ទូចរួចហើយ តែបានជួសជុលរួចរាល់សព្វគ្រប់ក៏ដំណើរការបង្កកើតជាហេតុការគ្រោះថ្នាក់ដ៏រន្ធត់សោកសង្រេងបែបនេះ ។ បន្ទាប់ពីកើតហេតុគេឃើញ ក្រុមហ៊ុនដឹផាក ស៊ីធី បុរីរបស់លោកឧកញ៉ា ឡៅ ប៊ុនប៉ា បានចូលរួមចូលបុណ្យសព្វជនរងគ្រោះក្នុងម្នាក់ ៣០០ដុល្លារ ជាសំណងបឋម ក្នុងការចូលរួមបុណ្យសព្វ។ ដោយឡែកចំពោះនីតិវិធីបន្ទាប់នោះ សមត្ថកិច្ចកំពុងចាត់ការ ក្នុងនោះ លោក គាត ហុល អភិបាលក្រុងប៉ោយប៉ែត បានឲ្យដឹងថា យើងបានសម្រេចផ្អាកសកម្មភាពការងារ ក្រុមហ៊ុនបុរីដឹផាក ស៊ីធី របស់លោកឧកញ៉ា ឡៅ ប៊ុនប៉ា ជាបណ្ដោះអាសន្នហើយ ចំពោះវិធានការផ្សេងៗ កំពុងចាត់ការទៅតាមផ្លូវច្បាប់ ។
សម្រាប់លោកឧត្ដមសេនីយ៍ត្រី សិទ្ធិ ឡោះ ស្នងការរងនគរបាលខេត្តបន្ទាយមានជ័យ បានឲ្យដឹងថា ចំពោះនីតិវិធីផ្នែកព្រហ្មទណ្ឌ បានកសាងសំណុំរឿងបញ្ជូនទៅតុលាការរួចហើយ ក្នុងនោះតាមការពិនិត្យកោសលវិច័យ ឃើញថា ទី១ ,ខុសបច្ចេកទេសមិនបានពិនិត្យឲ្យគ្រប់ជ្រុងជ្រោយ ហើយដីមានសភាពទន់ជ្រាយ ផ្អៀងម្ខាង រួមផ្សំនឹងខ្យល់ផងនោះ ធ្វើឲ្យដួលរលំដងសន្ទូចដែលស្ទូចធ្ងន់តែម្ដងទៅ ។ទី២,គឺអ្នកបញ្ជាគ្រឿងចក្រ មានការធ្វេសប្រហែស ។ បច្ចុប្បន្នអ្នកបញ្ជាគ្រឿងចក្រត្រូវបានឃាត់ខ្លួន បញ្ជូនទៅតុលាការ ។ ដោយឡែកមេការទុកឲ្យតុលាការចាត់ការបន្ដ។ បច្ចុប្បន្នមេការទទួលខុសត្រូវបញ្ជាគ្រឿងចក្រ បានរត់គេចខ្លួនបាត់ស្រមោល។
បើយោងតាមការបញ្ជាក់បន្ថែមពី ឯកឧត្តម ឧត្តមសេនីយ៍ទោ អាត់ ខែម ស្នងការនៃស្នងការដ្ឋាននគរបាលខេត្តបន្ទាយមានជ័យ បានលើកឡើងថា ជនបង្កគឺជាអ្នកបញ្ជាគ្រឿងចក្រ កំពុងស្ថិតក្រោមរង្វង់នៃច្បាប់ មួយទៀតជាម្ចាស់បុរី ក៏ជាអ្នកទទួលខុសត្រូវដែរ ដូចនេះ អ្នកទទួលខុសត្រូវមានអ្នកបញ្ជាគ្រឿងចក្រ និងម្ចាស់បុរី បើទោះជនទាំង២ មានចេតនា ឬគ្មានចេតនាក្តី ក៏ត្រូវទទួលខុសត្រូវចំពោះមុខច្បាប់ដែរ។
ឯកឧត្តម ឧត្តមសេនីយ៍ទោ អាត់ ខែម បានបន្ថែមទៀតថា គឺពុំទាន់មានភាគីខាងណាទទួលខុសត្រូវចំពោះអ្នកស្លាប់នៅឡើយទេ ដែលសាកសពកំពុងតម្កល់ធ្វើបុណ្យពីសំណាក់គ្រួសារនៅវត្តមួយកន្លែងក្នុងក្រុងប៉ោយប៉ែត។
គួរម្លឹកផងដែរថា កាលពីរសៀលថ្ងៃទី១២ សីហា មានមនុស្ស០៥នាក់បានស្លាប់ និង០៤នាក់ទៀតបានរងរបួសធ្ងន់ និងស្រាល ដោយសាររលំដងស្ទួចសង្កត់ពីលើ ពេលកំពុងស្ទូចសាងសង់ក្រុមហ៊ុនបុរីដឹផាក ស៊ីធី របស់លោកឧកញ៉ា ឡៅ ប៊ុនប៉ា ស្ថិតនៅភូមិគីឡូលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្ដបន្ទាយមានជ័យ ៕
