ចាប់ពីថ្ងៃទី០១ មករា ២០២១ទៅ ការលក់ផ្ទះ ដី រដ្ឋាភិបាលកម្ពុជាតម្រូវបង់ពន្ឋលើប្រាក់ចំណេញ២០% ចំណែកឯរដ្ឋាភិបាលថៃបែរជាកាត់បន្ថយពន្ធទៅវិញ
ប្រជាពលរដ្ឋនិងមជ្ឈដ្ឋានមួយចំនួនបានសម្តែងការមិនសប្បាយចិត្តនៅក្រោយពេលដែលក្រសួងសេដ្ឋកិច្ចនិងហិរញ្ញវត្ថុបានប្រកាសដាក់ឲ្យប្រើប្រាស់នូវ«ប្រកាសស្តីពីពន្ឋលើចំណេញមូលធន» ដោយខ្លះលើកឡើងថា ការបង់ពន្ឋ២០% លើប្រាក់ចំណេញគឺជាបន្ទុកដ៍ធ្ងន់ធ្ងររបស់ពួកគាត់។
សូមបញ្ជាក់ថា ប្រកាសដែលចុះហត្ថលេខដោយលោកឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុកាលពីថ្ងៃទី០១ មេសា ២០២០ និងចាប់អនុវត្តន៍ពីថ្ងៃទី០១ កក្កដា ២០២០ ប៉ុន្តែដោយសារវិបត្តិជំងឺកូវីដ១៩ រាជរដ្ឋាភិបាលក៍បានពន្យារពេលអនុវត្តប្រកាសនេះ ដោយចាប់អនុវត្តពីថ្ងៃទី០១ មករា ២០២១តទៅ ។
ពលរដ្ឋខ្លះ បានយល់ឃើញថា ច្បាប់ពន្ធ បន្ថែមថ្មី លក់ផ្ទះ លក់ដី ត្រូវបង់ពន្ធលើប្រាក់ចំណេញឲ្យរដ្ឋ ២០%
បើខាតឡុងចុង ទទួលខុសត្រូវខ្លួនឯង គឺជាអម្រែកមួយទៀត ខណៈដែលពួកគាត់កំពុងតែជួបវិបត្តិសេដ្ឋកិច្ចគ្រួសារដោយសារជំងឺកូវីដ១៩។
ចំណែក អ្នកខ្លះទៀតលើកឡើងថា អំឡុងពេលវិបត្តិកូវីដ១៩នេះ រាជរដ្ឋាភិបាល មិនគួរចេញច្បាប់នេះមកអនុវត្តន៍នោះឡើយ ហើយខ្លះទៀតក៍រិះគន់និងចោទថា រាជរដ្ឋាភិបាលប៉ះប៉ូវការបាត់បង់ EBA ២០% ទើបចេញប្រកាសឲ្យអនុវត្តន៍ពន្ឋលើប្រាក់ចំណេញនេះ ។
យ៉ាងណាក៍ដោយ ឆ្លើយតបទៅនឹងមតិរិះគន់នៅលើបណ្តាញសង្គមហ្វេសប៊ុក ក៍ដូចជានៅតាមតៀមការហ្វេនានានោះ លោក គង់ វិបុល ប្រតិភូរាជរដ្ឋាភិបាលទទួលបន្ទុកជា អគ្គនាយកនៃអគ្គនាយកដ្ឋានពន្ធដារ បានពន្យល់យ៉ាងដូច្នេះ«ពន្ធលើចំណេញមូលធន យើងមិនមែនយកពន្ធលើប្រជាពលរដ្ឋទូទៅនោះទេ គឺយកពន្ធតែលើចំណេញមូលធន ឧទាហរណ៍ ប្រជាពលរដ្ឋ ឬអ្នកមានអចលនទ្រព្យលក់ទ្រព្យនោះ ហើយបានចំណេញទើបយកពន្ធ ប្រសិនការទិញលក់អចលនទ្រព្យនោះ មិនមានការចំណេញ គឺមិនមានការយកពន្ធលើចំណេញមូលធននេះទេ។ »។
បើតាម លោក គង់ វិបុល ពន្ធលើចំណេញមូលធននេះ មិនមែនជាការបង្កើតពន្ធថ្មីនោះឡើយ តាមពិតពន្ធលើចំណេញមូលធននេះត្រូវបានកំណត់ក្នុងច្បាប់ឱ្យប្រមូលតាំងពីប្រមាណជាង ១០ ឆ្នាំកន្លងមកហើយ ។
ដោយឡែកកាលពីពេលថ្មីៗនេះ រដ្ឋាភិបាលថៃទើបនឹងសម្រេចកាត់បន្ថយពន្ធលើប្រាក់ចំណូលរបស់ពលរដ្ឋរបស់ខ្លួន ខណៈដែលកម្ពុជាទើបនឹងប្រកាសពីការយកពន្ធបន្ថែម២០% លើប្រាក់ចំណេញមូលធន។
លោក SuriyaJuangroongruangkit រដ្ឋមន្រ្តីក្រសួងឧស្សាហកម្មថៃ បានប្រាប់ឲ្យដឹងថា ការកាត់បន្ថយពន្ធប្រាក់ចំណូលរបស់ពលរដ្ឋនេះ គឺដើម្បីឲ្យពួកគេអាចមានលទ្ធភាពទិញរថយន្តថ្មី និងរថយន្តអគ្គិសនីមកប្រើប្រាស់ ហើយការកាត់បន្ថយពន្ធនេះនឹងមានរយៈពេល ៥ឆ្នាំ។
លោក Suriya បានបន្ថែមទៀតថា រដ្ឋាភិបាលថៃនឹងបាត់បង់ប្រាក់ចំណូលពន្ធប្រមាណ ៣,២០០លានដុល្លារ ពីការកាត់បន្ថយពន្ធនេះ ប៉ុន្តែវាបានប្ដូរមកវិញនូវការរស់នៅប្រកបដោយសុភមង្គលរបស់ប្រជាពលរដថៃជាមួយនឹងការប្រើប្រាស់រថយន្តថ្មី និងបរិយាកាសដែលគ្មានជាតិពុល។
សូមបញ្ជាក់ថា បច្ចុប្បន្នប្រទេសថៃកំពុងរងយ៉ាងខ្លាំងដោយសារវិបត្តិកូវីដ១៩ ប៉ុន្តែទោះជាយ៉ាងណារដ្ឋាភិបាលនៃប្រទេសនេះ នៅតែបន្តដាក់គោលនយោបាយថ្មីៗបន្ថែមទៀតដើម្បីជួយពលរដ្ឋរបស់ខ្លួនពីផលប៉ះពាល់នៃវិបត្តិកូវីដ១៩ ហើយដែលយើងឃើញកន្លងមករួមមាន៖ ការមិនយកថ្លៃប្រើប្រាស់អគ្គិសនី, ការកាត់បន្ថពន្ធអចលនទ្រព្យ, ការផ្ដល់ប្រាក់ឧបត្ថម្ភដល់បុគ្គលិកជាដើម៕
