កម្ពុជា-ថៃជួបប្រជុំពង្រឹងសម្ព័ន្ធមេត្រីភាពនៅព្រំដែនអន្តរជាតិប៉ោយប៉ែត-ខ្លងលលឹក
ខេត្តបន្ទាយមានជ័យ ៖ អាជ្ញាធរកម្ពុជា-ថៃគ្រោងនេះនឹងជួបប្រជុំនិងពិភាក្សាគ្នានៅអំឡុងម៉ោង១ទៅ២រសៀលថ្ងៃទី២៥ ខែវិច្ចិកា ឆ្នាំ២០២១នេះ នៅតំបន់ស្ពានមិត្តភាពកម្ពុជា ថៃនៃច្រកព្រំដែនអន្តរជាតិប៉ោយប៉ែតខេត្តបន្ទាយមានជ័យ-ខ្លងលឹកខេតក្នុងស្រះកែវ ។អាជ្ញាធរដែលជាប្រតិភូភាគីទាំង២រួមមាន មន្ត្រីថ្នាក់ដឹកនាំ៣ខេត្ត ខណសមភាគីកម្ពុជាមានលោក សុខ លូ អភិបាលខេត្តបាត់ដំបង លោកអ៊ុំ រាត្រី អភិបាលខេត្តបន្ទាយមានជ័យ និងសមភាគីថៃមានលោក ព្រីនយ៉ា ពោធិ៍សាត់ អភិបាលខេត្ត ស្រះកែវ នឹងចូលរួមកិច្ចពិភាក្សានោះ។
លោកអ៊ុំ រាត្រី អភិបាលខេត្តបន្ទាយមានជ័យប្រាប់ឲ្យដឹងថា ពិតជាមានគម្រោងជួបប្រជុំពង្រឹងសម្ព័ន្ធមេត្រីភាព៣ខេត្តបន្ទាយមានជ័យ បាត់ដំបង(កម្ពុជា ) និងខេត្តស្រះកែវ (ថៃ) នោះមែន ។លោកថា ខណនេះលោកផ្ទាល់និងលោកអភិបាលខេត្តបាត់ដំបង និងប្រតិភូបាននឹងកំពុងស្ថិតនៅមាត់ច្រកព្រំដែនអន្តរជាតិរួចហើយ ដើម្បីបើកកិច្ចប្រជុំនារសៀលនេះ ។
សូមរំលឹកថា កាលពីថ្ងៃទី១៧ ខែធ្នូ ឆ្នាំ២០២០ វេលាម៉ោង ១១និង១០នាទី ក៏មានកិច្ចប្រជុំពិភាក្សាការងារ ស្ដីពីការបន្ធូរបន្ថយច្បាប់ នៃការគ្រប់គ្រងស្ថានការណ៍ក្នុងគ្រាអាសន្ន ដើម្បីដោះស្រាយសេដ្ឋកិច្ចក្នុងតំបន់រវាង ខេត្តបន្ទាយមានជ័យ បាត់ដំបង និងខេត្តស្រះកែវនៅលើស្ពានមិត្តភាពកម្ពុជា-ថៃ ច្រកទ្វារព្រំដែនអន្តរជាតិភ្នំដី-ខៅឌិន ស្ថិតក្នុងភូមិគីឡូ ១៣ ឃុំសន្តិភាព ស្រុកសំពៅលូនខេត្តបាត់ដំបង ព្រះរាជាណាចក្រកម្ពុជា ឈមនឹងស្រុកខ្លងហាត ខេត្តស្រះកែវ ព្រះរាជាណាចក្រថៃឡង់ដ៍ រួចម្តងផងដែរ។
កាលណោះ មានការអញ្ជើញដឹកនាំប្រតិភូ និងចូលរួមជាកិត្តិយសក្នុងកិច្ចប្រជុំមាន ភាគីកម្ពុជា លោក អ៊ុំ រាត្រី អភិបាលខេត្តបន្ទាយមានជ័យ, លោក ងួន រតនៈ អភិបាលខេត្តបាត់ដំបង និងមានការចូលរួមពីសំណាក់លោកឧត្តមសេនីយ៍ទោ ច័ន្ទ រដ្ឋា មេបញ្ជាការរងយោធភូមិភាគទី៥ ទទួលបន្ទុកការងារព្រំដែនកម្ពុជា-ថៃ និងលោកអភិបាលរងខេត្ត, អភិបាល-អភិបាលរងក្រុង-ស្រុក ជាប់ព្រំដែន ព្រមទាំងលោកឧត្ដមសេនីយ៍ វរសេនីយ៍ ស្ថាប័នពាក់ព័ន្ធមួយចំនួន ។
ចំណែកភាគីថៃ មានលោកគៀតតិស័ក្កិ ចាន់ត្រា អភិបាលខេត្តស្រះកែវ ដោយមានការចូលរួមពីលោកប្រធាន-អនុប្រធានមន្ទីរ ស្ថាប័នពាក់ព័ន្ធ និងមន្ត្រីមុខការចំណុះខេត្ត ជាច្រើនរូបទៀត។
ឆ្លងតាមកិច្ចពិភាក្សា ភាគីទាំងពីរបានឯកភាពគ្នាលើចំណុចសំខាន់ៗដូចតទៅ ៖ ១-ឯកភាពឲ្យពលករកម្ពុជាចូលទៅធ្វើការងារ លើវិស័យកសិកម្ម ក្នុងព្រះរាជាណាចក្រថៃបាន ប៉ុន្តែត្រូវអនុវត្តតាមសេចក្ដីណែនាំ របស់ក្រសួងសុខាភិបាល នៃព្រះរាជាណាចក្រថៃ (ចត្តាឡីស័ក១៤ថ្ងៃ), ២- ចំពោះអាជីវករកម្ពុជាចូលទៅប្រកបអាជីវកម្ម ក្នុងផ្សាររោងក្លឿ ស្រុកអរញ្ញប្រាថេតខេត្តស្រះកែវ ត្រូវធ្វើចត្តាឡីស័ក១៤ថ្ងៃដូចគ្នា,៣-ដោយឡែកការស្នើរសុំបើកច្រកទ្វារព្រំដែនអន្តរជាតិស្ទឹងបត់-បានណងអៀនបណ្ដោះអាសន្ន ជាច្រកដឹកទំនិញ ដើម្បីកាត់បន្ថយការកកស្ទះ នៅច្រកទ្វារព្រំដែនអន្តរជាតិប៉ោយប៉ែត-ខ្លងលិក ខាងភាគីថៃនិងយកសំណើរនេះ ដាក់ជូនគណៈកម្មាធិការខេត្ត ដើម្បីពិនិត្យពិភាក្សាលំអិត បន្ទាប់ពីបានទទួលលទ្ធផល ទើបផ្ដល់ព័ត៌មានជូនវិញជាក្រោយ ។
ភាគីទាំងពីរក៏បានសំណូមពរ ឲ្យសមត្ថកិច្ច និងស្ថាប័នពាក់ព័ន្ធ រវាងប្រទេសទាំងពីរ បង្កើនកិច្ចសហប្រត្តិបត្តិការរួមគ្នា ឲ្យកាន់តែល្អប្រសើរ ប្រកបដោយប្រសិទ្ធិភាពខ្ពស់ និងរក្សាស្ថានភាពដើម នៃបន្ទាត់ព្រំដែន។ រាល់ករណីកើតមានឡើង រាល់បញ្ហាផ្សេងៗចំពោះពលរដ្ឋ នៃប្រទេសទាំងពីរ ត្រូវផ្ដល់ព័ត៌មានទាន់ហេតុការណ៍ ឲ្យគ្នាទៅវិញទៅមក និងរួមគ្នាដោះស្រាយដោយសន្តិវិធី៕
