បន្ទាយមានជ័យ៖ប្រភពស្និទ្ធនឹងលោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្កា្របការក្លែងបន្លំ បានឲ្យដឹងថា គ្រាន់តែនៅក្នុងគំរោងស្នើថវិកាទិញសម្ភារៈសម្រាប់មន្ទីរពិសោធន៍របស់អគ្គនាយកដ្ឋានគឺមានការបំប៉ោងតម្លៃរាប់លានដុល្លារក្នុង១ឆ្នាំៗ។ ជាងនេះទៅទៀតលោក ផាន អូន បានលើកគម្រោងសាងសង់មន្ទីរពិសោធន៍ខ្នាតតូចសម្រាប់បណ្តាខេត្ត-ក្រុង បំប៉ោងគម្រោងដល់ទៅជិត២០ម៉ឺនដុល្លារ ក្នុងមួយកន្លែងៗ​​ តែការចំណាយពិតប្រាកដអស់មិនដល់៥ម៉ឺនដុល្លារ ផង។ ប្រភពបានឲ្យដឹងថា លោក ផាន អូន ប្រើគ្រប់វិធីបំប៉ោងគម្រោងចំណាយស្រេចតែអំពើចិត្តដើម្បីកេងប្រវ័ញ្ចថវិកាជាតិ ដើម្បីប្រយោជន៍ផ្ទាល់ខ្លួននិងបក្ខពួកមួយចំនួនហើយលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បែរជារក្សាភាពស្ងៀមស្ងាត់ទៅវិញ។ ថ្មីៗនេះរឿងអាស្រូវពុករលួយតាមច្រើនរូបភាពរបស់លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្កា្របការក្លែងបន្លំ(អតីតអគ្គនាយកដ្ឋានកាំកុងត្រូល) ត្រូវបានលាតត្រដាងជាបន្តបន្ទាប់។ ជុំវិញបញ្ហានេះមន្រ្តីនៅក្នុងក្រសួងពាណិជ្ជកម្ម បានលើកឡើងថា បើគ្មានការបើកដៃពីសំណាក់លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ទេនោះគឺលោក ផាន អូន មិនអាចធ្វើអ្វីៗតាមអំពើចិត្តបានទេ។ ហេតុនេះហើយទើបមានសេចក្តីអំពាវនាវឲ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បើការស៊ើបអង្កេតទៅលើរឿងអាស្រូវពុករលួយពេញបន្ទុករបស់លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្កា្របការក្លែងបន្លំ ជាបន្ទាន់។ ប្រភពស្និទ្ធនឹងលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានបង្ហើបឲ្យដឹងថា លោក ផាន អូន បានរួមដៃជាមួយប្រធាននាយកដ្ឋានរដ្ឋបាល ព្រមទាំងជាមួយប្រធាននាយកដ្ឋានគណនេយ្យនិងហិរញ្ញវត្ថុក្រសួងពាណិជ្ជកម្ម ដកលុយរាប់លានដុល្លារ ទិញដីធ្វើផ្ទះជូនលោក ប៉ាន សូរស័ក្តិ ដែលជាចៅហ្វាយនាយរបស់ខ្លួន។ ហេតុនេះហើយទើបលោក ប៉ាន សូរស័ក្តិ សម្ងំស្ងាត់ឈឹងបណ្តោយឲ្យលោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្កា្របការក្លែងបន្លំ និងបក្ខពួកធ្វើអ្វីៗតាមអំពើចិត្ត។ ឥឡូវនេះរឿងអាស្រូវពុករលួយច្រើនបែបច្រើនយ៉ាងរបស់លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្កា្របការក្លែងបន្លំ មិនអាចបិទបាំងតទៅទៀតបានទេ ហើយមជ្ឈដ្ឋាននានាសង្ឃឹមថា លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បើកការស៊ើបអង្កេតឲ្យបានស៊ីជម្រៅ។