បន្ទាយមានជ័យ៖ ប្រភពស្និទ្ធនឹងលោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ បានឲ្យដឹងថា បើគ្មានការបើកដៃពីលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មទេនោះគឺលោក ផាន អូន មិនអាចធ្វើអ្វីតាមអំពើចិត្តបានឡើយ។ មានន័យថា អំពើពុករលួយច្រើនបែបច្រើនយ៉ាងរបស់លោក ផាន អូន គឺជាប្រភពចំណូលរបស់លោក ប៉ាន សូរស័ក្តិ ផងដែរទើបអ្វីៗអាចប្រព្រឹត្តទៅយ៉ាងសុខស្រួល។ ដូច្នេះលោកនាយករដ្ឋមន្រ្តី ហ៊ុន សែន ដែលជាប្រមុខរាជរដ្ឋាភិបាល មិនគួរបណ្តែតបណ្តោយឲ្យលោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ ព្រមទាំងបក្ខពួកធ្វើអ្វីៗតាមអំពើចិត្តតទៅទៀតនោះទេ។ ប្រភពពីមន្ត្រីរាជការនៅក្នុងក្រសួងពាណិជ្ជកម្មបានឲ្យដឹងថា ទោះបីរឿងអាស្រូវពុករលួយពេញទំហឹងរបស់លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ(អតីតអគ្គនាយកដ្ឋានកាំកុងត្រូល) ត្រូវបានបើកកកាយជាសាធារណៈក៏ដោយក៏លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មធ្វើមិនដឹងមិនឮអ្វីទាំងអស់។ ហេតុនេះហើយទើបលោក ផាន អូន និងបក្ខពួករួមដៃគ្នាប្រព្រឹត្តអំពើពុករលួយកេងប្រវ័ញ្ចថវិកាជាតិស្រេចតែអំពើចិត្តហើយពង្រឹងបណ្តាញពុករលួយកាន់តែរឹងមាំ។ លើសនេះទៅទៀតលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ មិនទាន់បើកការស៊ើបអង្កេតឲ្យបានស៊ីជម្រៅទៅលើរឿងអាស្រូវពុករលួយរបស់លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ នៅឡើយទេ។ បើតាមប្រភពខ្លះបង្ហើយឲ្យដឹងថា បច្ចុប្បន្នអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ ស្ទើរតែក្លាយទៅជាក្រុមហ៊ុនរកស៊ីផ្តាច់មុខរបស់លោក ផាន អូន និងបក្ខពួកទៅហើយ។ ប្រភពបានឲ្យដឹងទៀតថា តំណែងសំខាន់ៗពាក់ព័ន្ធចំណូលចំណាយក្នុងអគ្គនាយកដ្ឋានគឺលោក ផាន អូន បានតែងតាំងមនុស្សជំនិតរបស់ខ្លួនឲ្យកាន់តំណែងទាំងនោះដើម្បីងាយស្រួលប្រមូលផលប្រយោជន៍។ ចំណែកលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម សម្ងំស្ងាត់ឈឹងទុកឲ្យលោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ និងបក្ខពួករួមដៃគ្នាប្រព្រឹត្តអំពើពុករលួយយ៉ាងពេញទំហឹង។